ആശങ്കയുടെ വനിതാ മതില്‍ കടന്ന് സിപിഎം

ആശങ്കയുടെ വനിതാ മതില്‍ കടന്ന് സിപിഎം

വനിതകള്‍ സംഘാടക പ്രതീക്ഷകളെ തെല്ലും നിരാശപ്പെടുത്തിയില്ല. മതിലിന് ആവോളം കല്ലും മണ്ണും വെള്ളവും അവര്‍ പകര്‍ന്നു. തിരിച്ചിങ്ങോട്ടും സര്‍ക്കാരിന്റെയും സിപിഎമ്മിന്റെയും സഹായഹസ്തമുണ്ടാകുമെന്ന അവരുടെ പ്രതീക്ഷകള്‍ എത്രത്തോളം ഫലവത്താകുമെന്ന് കണ്ടറിയേണ്ടിയിരിക്കുന്നു. കാസര്‍കോഡ് മുതല്‍ തിരുവനന്തപുരം വരെ നീണ്ട മതിലില്‍ 50 ലക്ഷത്തിലേറെ സ്ത്രീരത്‌നങ്ങള്‍ അണിനിരന്നുവെന്നാണ് ഔദ്യോഗിക കണക്ക്. കുറച്ചുലക്ഷങ്ങള്‍ കൂട്ടിപ്പറഞ്ഞിട്ടുണ്ടെങ്കില്‍ പോലും മതിലിന്റെ വിജയത്തെ കുറച്ചുകാണാനാകില്ല.
വനിതാ മതിലിന്റെ വിജയത്തിന് ഏറ്റവും വലിയ പ്രചാരകരായിരുന്നത് കോണ്‍ഗ്രസുകാരായിരുന്നുവെന്നതും ചരിത്രത്തില്‍ രേഖപ്പെടുത്തേണ്ടതാണ്. വെള്ളത്തില്‍ വരവരയ്ക്കല്‍, സര്‍ക്കാരുദ്യേഗസ്ഥരെ ഭീഷണിപ്പെടുത്തല്‍(മറ്റവന്മാരുടെ ഭീഷണി കേട്ടാണ് പാവങ്ങള്‍ മതിലിന് ഇറങ്ങിത്തിരിച്ചത്), ഓഫീസുകള്‍ ഉപരോധിക്കല്‍ എന്നിങ്ങനെ തങ്ങളേക്കൊണ്ടാകുന്ന പബ്ലിസിറ്റിയെല്ലാം യുഡിഎഫുകാര്‍ നല്കിയിരുന്നു. പ്രതിപക്ഷ നേതാവ് രമേശ് ചെന്നിത്തല ഓരോ ദിവസവും മതിലിനു വേണ്ടി വാര്‍ത്താസമ്മേളനം വിളിച്ചുകൂട്ടി. ടിയാന്‍ പറയുന്ന കാര്യങ്ങള്‍ മതിലിന് എതിരായിരുന്നെങ്കിലും ഫലത്തില്‍ അനുകൂലമായി വന്നു. പണ്ട് ഒനിഡ ടിവിയുടെ പരസ്യമുണ്ടായിരുന്നതോര്‍ക്കുമല്ലോ! അസൂയമൂത്ത് ടിവി തല്ലിപ്പൊളിക്കുന്ന ഈ പരസ്യത്തിലൂടെയാണ് ഒനിഡക്കാര്‍ വിപണി പിടിച്ചെടുത്തത്. ചെന്നിത്തലയ്ക്ക് എന്തേ ആരുമൊരു പുരസ്‌കാരം നല്കുന്നില്ലായെന്ന് മലയാളികള്‍ അത്ഭുതപ്പെട്ടുപോകും. സിപിഎം മനസുവെച്ച് അദ്ദേഹത്തെ ആദരിക്കേണ്ടതാണ്. പൊതുതിരഞ്ഞെടുപ്പിന്റെ ഒരുക്കത്തിന് രാഹുല്‍ ഗാന്ധി ഈ മാസം കേരളത്തിലെത്തുന്നുണ്ട്. അതോടെ കോണ്‍ഗ്രസ് തിരഞ്ഞെടുപ്പ് പ്രചരണ ഒരുക്കങ്ങളിലേക്കു പ്രവേശിക്കുമെന്നാണ് കോണ്‍ഗ്രസ് വൃത്തങ്ങള്‍ പറയുന്നത്. ശബരിമലയില്‍ കാടിളക്കി മറ്റു രണ്ടുകൂട്ടരും തിരഞ്ഞെടുപ്പ് ഗോദയിലേക്ക് പ്രവേശിച്ച കാര്യം പാവങ്ങള്‍ അറിഞ്ഞിട്ടില്ല.
സംഘ്പരിവാറുകാര്‍ മതിലുയര്‍ത്താന്‍ വന്ന സ്ത്രീകളെ വിരട്ടിയോടിക്കുന്ന തിരക്കിലായിരുന്നതിനാല്‍ പുതുവര്‍ഷത്തില്‍ ശബരിമലയിലെത്താന്‍ കഴിഞ്ഞിരുന്നില്ല. കനകദുര്‍ഗയ്ക്കും ബിന്ദുവിനും അതു സുവര്‍ണാവസരവുമായി. യുവതികള്‍ അയ്യപ്പദര്‍ശനം നടത്തിയാല്‍ നട അടച്ച് ശുദ്ധികലശം നടത്തിയാല്‍ പരിഹാരമാകുമെങ്കില്‍ ഇത്രയും ബലംപിടുത്തം സംഘ്പരിവാറിനും സര്‍ക്കാരിനും വേണമായിരുന്നോ എന്ന ചോദ്യം അവശേഷിക്കുന്നു. ഏതെങ്കിലും ദിവസം നിശ്ചയിച്ച് വനിതകളെ മലകയറ്റുക, എന്നിട്ട് കുറച്ചുനേരം നടയടച്ചിട്ട് ശുദ്ധികലശം നടത്തുക. അത്രയേ വേണ്ടൂ. നടപൂട്ടി താക്കോല്‍ പന്തളം കൊട്ടാരത്തിലെത്തിക്കാതിരുന്നാല്‍ മതി.
ശബരിമല സ്ത്രീ പ്രവേശനവുമായി ബന്ധപ്പെട്ട് ബിജെപി ഉയര്‍ത്തിയ രാഷ്ട്രീയ വെല്ലുവിളികളെ മറികടക്കുന്നതിനും പ്രതിരോധം തീര്‍ക്കുന്നതിനും സര്‍ക്കാരിന്റെ മുന്‍കയ്യിലായിരുന്നുവല്ലോ മതില്‍ പണിതത്. മതില്‍ പ്രഖ്യാപനം പെട്ടെന്ന് കഴിഞ്ഞെങ്കിലും തുടര്‍ന്നുണ്ടായ എതിര്‍പ്പുകള്‍ സിപിഎമ്മുകാരെ വിറപ്പിച്ചുവെന്നത് നേര്. കാരണം എസ്എന്‍ഡിപി യോഗം നേതാവ് വെള്ളാപ്പള്ളി നടേശനാണ് സംഘാടക സമിതി ചെയര്‍മാന്‍. ചേകവന്റെ റിക്കാര്‍ഡ് അത്ര മികച്ചതല്ല. ആദ്യം സിപിഎമ്മിനോടൊപ്പം, പിന്നെ യുഡിഎഫിന്റെ ചാരെ, പിന്നെപ്പിന്നെ സംഘ്പരിവാര്‍ സംബന്ധം. മകന്‍ തുഷാര്‍ വെള്ളാപ്പള്ളി ഇപ്പോഴും ബിജെപിയുമായുള്ള മധുവിധുവിന്റെ ലഹരിയിലുമാണ്. ഏതു നിമിഷവും ആലപ്പുഴക്കാരന്‍ പാലം വലിച്ചേക്കുമെന്ന ആശങ്ക.
മതിലെഴുത്തില്‍ പ്രത്യക്ഷത്തില്‍ സിപിഎം ഇല്ലെന്നാണ് വയ്പ്. പക്ഷേ വിറകുവെട്ടിയതും വെള്ളം കോരിയതും പാര്‍ട്ടിയിലെ പിണറായി പക്ഷക്കാര്‍ തന്നെ. കാര്‍ന്നോര്‍ ഇടയ്ക്ക് ഉറക്കമുണര്‍ന്ന് മതിലില്‍ മുറുക്കിത്തുപ്പിയെങ്കിലും ഒരു ഫലവുമുണ്ടായില്ല. എന്തിനും ഏതിനും വിഎസ് എന്നു പറഞ്ഞിരുന്ന കാനം പോലും കാലുവാരി. മതിലില്‍ വിള്ളല്‍ വീണിരുന്നെങ്കില്‍ അത് സിപിഎമ്മിന്റെ പിടലിക്കാരുന്നാനേയെന്നതില്‍ സംശയമൊന്നുമില്ല.
ശബരിമലയിലെ ആചാര സംരക്ഷണത്തിനെന്ന പേരില്‍ സംഘ്പരിവാരുകാര്‍ സ്ത്രീകളെ നിരത്തിലിറക്കിയപ്പോള്‍ സ്ത്രീകളെത്തന്നെ ഇറക്കി അതിനെ നേരിടാനുള്ള സിപിഎമ്മിന്റെ ശ്രമമായിരുന്നു വനിതാ മതില്‍. കടിച്ച പാമ്പിനെ കൊണ്ട് വിഷമിറപ്പിക്കുന്ന പഴയ വിഷവൈദ്യം തന്നെ. (വനിതകള്‍ വിഷമാണെന്ന് ഉദ്ദേശിച്ചിട്ടില്ലെന്ന് ലേഖകന്‍).


Related Articles

യേശുവിൻറെ പാതയിലൂടെ പ്രയാണം

? സന്യസ്തര്‍ക്ക് നിരവധി സേവനമേഖലകളുണ്ടല്ലോ. എന്തുകൊണ്ട് വ്യത്യസ്തമായ ഭവനനിര്‍മാണമേഖല തെരഞ്ഞെടുത്തു. * നമ്മള്‍ ഏറ്റവും ഫോക്കസ് നല്‌കേണ്ട മേഖലയാണ് വീടുകള്‍. കുട്ടികള്‍ക്ക് ആരോഗ്യമുണ്ടാകണമെങ്കില്‍ നല്ല വീടു വേണം.

കാരിത്താസ് ഇന്ത്യയുടെ അവാര്‍ഡിന് അര്‍ഹരായി മലയാളികളും

ദേശീയ സന്നദ്ധപ്രവര്‍ത്തകരുടെ ദിവസമായ ഡിസംബര്‍ 19 ന് രാജ്യത്ത് വ്യത്യസ്ഥ മേഖലകളില്‍ സന്നദ്ധപ്രവര്‍ത്തനം നടത്തുന്നവരെ കാരിത്താസ് ഇന്ത്യ അവാര്‍ഡ് നല്‍കി ആദരിച്ചു. സ്ത്രീ സുരക്ഷ, കോവിഡ് കാലത്ത്

തൂത്തുക്കുടിയിൽ പോലീസ് വെടിവെപ്പിൽ 12 മരണം

തൂത്തുക്കുടിയിലെ സ്റ്റാർലൈറ്റ് ചെമ്പ് ശുദ്ധീകരണ ശാല അടച്ചുപൂട്ടണമെന്നാവശ്യപ്പെട്ട് പ്രതിഷേധിച്ചവർക്കുനേരെ പോലീസ് വെടിവെപ്പിൽ 12 പേർ കൊല്ലപ്പെട്ടു. പോലീസുകാർ ഉൾപ്പെടെ മുപ്പതോളം പേർക്ക് പരിക്കേറ്റു. പരിക്കേറ്റ പലരുടെയും നില

No comments

Write a comment
No Comments Yet! You can be first to comment this post!

Write a Comment

Your e-mail address will not be published.
Required fields are marked*