Breaking News

എന്റെ ജീവിതത്തിലെ ഏറ്റവും പ്രധാനപ്പെട്ട വ്യക്തി

എന്റെ ജീവിതത്തിലെ ഏറ്റവും പ്രധാനപ്പെട്ട വ്യക്തി

അഞ്ചു വര്‍ഷത്തെ ദാമ്പത്യജീവിതം പിന്നിട്ടവര്‍ക്കായി കുടുംബജീവിതത്തെക്കുറിച്ച് ഒരു സെമിനാര്‍ നടക്കുകയായിരുന്നു. ചില അംഗങ്ങള്‍ ക്ലാസില്‍ അശ്രദ്ധയോടെ ഇരിക്കുന്നതുകണ്ട അധ്യാപകന്‍ പറഞ്ഞു: ‘നമുക്ക് ചെറിയൊരു എക്‌സര്‍സൈസ് ചെയ്യാം. എല്ലാവരും നോട്ടുബുക്കില്‍ തങ്ങളുടെ ജീവിതത്തിലെ പ്രധാനപ്പെട്ട മുപ്പതോളം വ്യക്തികളുടെ പേരെഴുതുക.’
സെമിനാറില്‍ പങ്കെടുക്കുന്നവരെല്ലാം ഉടനെ തന്നെ ബുക്കും പേനയുമെടുത്ത് തങ്ങളുടെ കുടുംബാംഗങ്ങളുടെയും സ്‌നേഹിതരുടെയും പേരുകള്‍ എഴുതി.
അടുത്തതായി, ഈ മുപ്പതു പേരുകളില്‍നിന്ന് അത്ര പ്രധാനപ്പെട്ടതല്ലാത്ത അഞ്ചു പേരുകള്‍ നീക്കം ചെയ്യുക. ഉടനെ എല്ലാവരും തങ്ങള്‍ എഴുതിയ പേരുകള്‍ നോക്കിയിട്ട് അഞ്ചെണ്ണം വീതം നീക്കം ചെയ്തു. അടുത്തതായി അധ്യാപകന്‍ പറഞ്ഞത്, ഇനി അഞ്ചു പേരുകള്‍ കൂടി നീക്കം ചെയ്യുക എന്നാണ്.
അവര്‍ അതും ചെയ്തു. പിന്നെയും അഞ്ചെണ്ണം കൂടി മാറ്റാന്‍ പറഞ്ഞു. അങ്ങനെ തങ്ങളുടെ ലിസ്റ്റിലുള്ള പേരുകള്‍ കുറഞ്ഞു കുറഞ്ഞുവന്നു. അതോടെ സ്‌നേഹിതരെല്ലാം ലിസ്റ്റില്‍നിന്ന് അപ്രത്യക്ഷരായി.
പലരുടെയും അവസാനത്തെ ലിസ്റ്റില്‍ ഉണ്ടായിരുന്നത് മാതാപിതാക്കന്മാരും ജീവിതപങ്കാളിയും മക്കളുമായിരുന്നു. ശേഷിച്ച അഞ്ചുപേരില്‍നിന്ന് രണ്ടു പേരുകള്‍കൂടി നീക്കം ചെയ്യാന്‍ അധ്യാപകന്‍ ആവശ്യപ്പെട്ടു. പലരും ചിന്താക്കുഴപ്പത്തിലായി. ആരുടെ പേരുകള്‍ നീക്കം ചെയ്യും? അതുവരെ കളിചിരിയോടെ കഴിഞ്ഞവര്‍ ഗൗരവമായി ചിന്തിക്കാന്‍ തുടങ്ങി. മാതാപിതാക്കന്മാരുടെയോ മക്കളുടെയോ?
ചിലര്‍ മാതാപിതാക്കന്മാരുടെ പേരുകള്‍ നീക്കം ചെയ്തപ്പോള്‍ മറ്റു ചിലര്‍ മക്കളുടേത് നീക്കംചെയ്തു. അധ്യാപകന്‍ അവരിലൊരാളോട് ബ്ലാക്‌ബോര്‍ഡിനരികില്‍ വരാന്‍ പറഞ്ഞു. മായ എന്നായിരുന്നു അവരുടെ പേര്. എന്നിട്ട് മായയുടെ ലിസ്റ്റിലുള്ള മൂന്നുപേരുടെ പേരുകള്‍ ബോര്‍ഡില്‍ എഴുതാന്‍ പറഞ്ഞു. ലിസ്റ്റില്‍ ജീവിതപങ്കാളി, മകന്‍, മകള്‍ എന്നിവര്‍ മാത്രം ശേഷിച്ചു. അവരില്‍നിന്ന് ഒരു പേരുകൂടി നീക്കം ചെയ്യാന്‍ അധ്യാപകന്‍ ആവശ്യപ്പെട്ടു. വളരെ പ്രയാസത്തോടെ മായ തന്റെ മകളുടെ പേര് മാറ്റി. ബോര്‍ഡില്‍ രണ്ടു പേര്‍ മാത്രം ബാക്കിയായി-ഭര്‍ത്താവും മകനും. ഈ രണ്ടുപേരില്‍ നിങ്ങളുടെ ജീവിതത്തിലെ ഏറ്റവും പ്രധാനപ്പെട്ട വ്യക്തി ആരാണെന്ന ചോദ്യത്തിനുമുന്നില്‍ മായ വിഷമിച്ചുനിന്നു. അവസാനം മകന്റെ പേരും നീക്കം ചെയ്തു.
എന്താണ് മറ്റുള്ളവരേക്കാള്‍ പ്രാധാന്യം ഭര്‍ത്താവിന് നല്കിയത് എന്നു അധ്യാപകന്‍ ചോദിച്ചപ്പോള്‍ മായ പറഞ്ഞു: ‘തനിക്ക് ജന്മം നല്കിയത് മാതാപിതാക്കന്മാരാണെങ്കിലും അവര്‍ പ്രായമാകുമ്പോള്‍ ഈ ലോകത്തോടു വിടപറയും. മകനെ പോലെ തന്നെ പ്രിയപ്പെട്ടവളാണ് മകളെങ്കിലും അവളുടെ വിവാഹം കഴിയുമ്പോള്‍ അവള്‍ വീട്ടില്‍നിന്നുപോകും. മകന്‍ കൂടെയുണ്ടാകുമെങ്കിലും അവന്റെ വിവാഹം കഴിഞ്ഞ് കുട്ടികളുണ്ടായി കഴിയുമ്പോള്‍ അവനും വേറെയാകും. പിന്നെ കൂടെയുണ്ടാകുന്നത് ഒരേയൊരാള്‍ മാത്രമായിരിക്കും-ഭര്‍ത്താവ്. ആ ഉത്തരത്തോട് ക്ലാസിലുണ്ടായിരുന്ന എല്ലാവരും യോജിച്ചു.
ഈ എക്‌സര്‍സൈസ് നമ്മളെല്ലാവരും ജീവിതത്തില്‍ വല്ലപ്പോഴുമൊക്കെ ചെയ്യുന്നത് നല്ലതാണ്. ആരാണ് എന്റെ ജീവിതത്തിലെ ഏറ്റവും പ്രധാനപ്പെട്ട വ്യക്തി? വിവാഹിതര്‍ക്ക് ജീവിതപങ്കാളിയാണെങ്കില്‍ അവിവാഹിതര്‍ക്ക്, അല്ലെങ്കില്‍ പങ്കാളി മരിച്ചുപോയവര്‍ക്ക്, പുരോഹിതര്‍ക്കും സന്ന്യസ്തര്‍ക്കും ആരാണ് ഏറ്റവും പ്രധാനപ്പെട്ട വ്യക്തി? എന്തുകൊണ്ടാണ് അയാള്‍ എന്റെ ജീവിതത്തില്‍ പ്രഥമസ്ഥാനം അര്‍ഹിക്കുന്നത്?
ചിലര്‍ക്ക് കുടുംബബന്ധങ്ങളെക്കാള്‍ വലുത് സുഹൃദ്ബന്ധങ്ങളായിരിക്കും, അത് രണ്ടു വ്യക്തികള്‍ തമ്മിലുള്ള സ്‌നേഹത്തിന്റെ ആഴമനുസരിച്ചായിരിക്കും. സ്വാര്‍ഥതാല്പര്യങ്ങളില്ലാതെ എന്നെ സ്‌നേഹിക്കുന്ന, എന്റെ കുറ്റങ്ങളും കുറവുകളും പരിഗണിക്കാതെ എന്റെ നന്മകളെ പുകഴ്ത്തുന്ന, ആപത്ഘട്ടങ്ങളില്‍ എന്നെ സഹായിക്കുന്ന, എനിക്കുവേണ്ടി മറ്റുള്ളവരോട് വാദിക്കുന്ന വ്യക്തി ആരാണോ അയാളെയായിരിക്കും ഞാന്‍ എന്റെ ജീവിതത്തിലെ ഏറ്റവും പ്രധാനപ്പെട്ട വ്യക്തിയായി തിരഞ്ഞെടുക്കുക. വൈവാഹിക ജീവിതത്തില്‍ അങ്ങനെയുള്ള വ്യക്തി, ജീവിതപങ്കാളിയായിരിക്കേണ്ടതാണ്. പക്ഷേ, എത്രപേര്‍ക്ക് തങ്ങളുടെ ജീവിതത്തിലെ ഏറ്റവും പ്രധാനപ്പെട്ട വ്യക്തി തന്റെ ഭാര്യയാണ്/ഭര്‍ത്താവാണ് എന്നു തുറന്നുപറയാന്‍ പറ്റും?
നമുക്കു മറ്റൊരു ചോദ്യം ചോദിക്കാം: ഞാനാണ് അവരുടെ ജീവിതത്തിലെ ഏറ്റവും പ്രധാനപ്പെട്ട വ്യക്തിയെന്ന് ആരായിരിക്കും പറയുക? അങ്ങനെ മറ്റുള്ളവര്‍ക്ക് തിരഞ്ഞെടുക്കാന്‍ പറ്റിയ ഒരു വ്യക്തിത്വത്തിന്റെ ഉടമയാണോ ഞാന്‍? എന്റെ മഹത്വം എന്റെ സമ്പത്തിനെയോ ഡിഗ്രിയെയോ സ്ഥാനമാനത്തെയോ ആശ്രയിച്ചല്ല നിലകൊള്ളുന്നത്. അത് ഞാന്‍ എങ്ങനെ മറ്റുള്ളവര്‍ക്ക് ഉപയോഗപ്രദമാകുന്നു എന്നതിനെ ആശ്രയിച്ചാണ്.
യേശുനാഥന് സമ്പത്തും ഔദ്യോഗികസ്ഥാനമാനങ്ങളും അധികാരവും ഒന്നും ഇല്ലായിരുന്നു. എന്നിട്ടും അവിടുന്ന് എല്ലാവര്‍ക്കും എല്ലാമായി. എന്റെ കഴിവുകള്‍, അറിവ്, സമ്പത്ത് ഇതൊക്കെ മറ്റുള്ളവരുടെ നന്മയ്ക്കായി വിനിയോഗിക്കുമ്പോള്‍ ഞാനും അവര്‍ക്ക് പ്രിയപ്പെട്ട വ്യക്തിയായിത്തീരും. പിന്നെ, എത്രയൊക്കെ നല്ലവനായാലും ചിലര്‍ നമ്മെ ഇഷ്ടപ്പെടണമെന്നില്ല. യേശുനാഥനില്‍ പോലും കളങ്കം കണ്ടവര്‍ നമ്മളെ വെറുതേവിടാന്‍ പോകുന്നില്ല. എങ്കിലും ഈ പുതുവര്‍ഷം നന്മനിറഞ്ഞ ഒരു വ്യക്തിത്വത്തിന്റെ ഉടമയാകാന്‍ പരിശ്രമിക്കാം.


Related Articles

ആർച്ച് ബിഷപ്പിന് പിന്തുണ ജോർജ് ഫിലിപ്പിൻറെ ബുള്ളറ്റും ലേലത്തിന്

മെത്രാപ്പോലീത്തയുടെ മാതൃക സ്വീകരിച്ച് പൊന്നോമന ബുള്ളറ്റിനെ ദുരിതാശ്വാസ പ്രവർത്തനങ്ങൾക്കായി വിൽക്കാൻ തയ്യാറായി എറണാകുളം സ്വദേശി മുടവത്തിൽ ജോർജ്ജ് ഫിലിപ്പ്‌. കഴിഞ്ഞദിവസം വരാപ്പുഴ അതിരൂപത മെത്രാപ്പോലീത്ത ജോസഫ് കളത്തിപ്പറമ്പിൽ

“ഇസ്‌ളാമിസം പൈശാചികമായ മതഭ്രാന്താണ്: കര്‍ദ്ദിനാള്‍ റോബര്‍ട്ട് സാറ.

റോം: ഫ്രാൻസിലെ നീസ് നഗരത്തിലെ ക്രൈസ്തവ ബസിലിക്ക ദേവാലയത്തില്‍ തീവ്രവാദി നടത്തിയ ആക്രമണത്തിനു പിന്നാലെ ഇസ്ലാമിക ഭീകരതക്കെതിരെ ശക്തമായ മുന്നറിയിപ്പുമായി വത്തിക്കാന്‍ ആരാധനാ തിരുസംഘത്തിന്റെ തലവനായ കര്‍ദ്ദിനാള്‍

കളമശേരി ലിറ്റില്‍ ഫ്ലവറില്‍ ഇനി വെല്‍ഡര്‍ റോബോട്ട്

വെല്‍ഡിംഗ് മേഖലയിലെ അതിവിദഗ്ദനായ ഒരു ജോലിക്കാരന്‍ ഒരു മണിക്കൂര്‍ കൊണ്ട് പൂര്‍ത്തിയാക്കുന്ന ജോലി കളമശേരി ലിറ്റില്‍ ഫഌവര്‍ എന്‍ജിനീയറിംഗ് ഇന്‍സ്റ്റിറ്റിയൂട്ടിലെ പുതിയവെല്‍ഡര്‍ ഇനി നിമിഷങ്ങള്‍ കൊണ്ട് തീര്‍ക്കും.

No comments

Write a comment
No Comments Yet! You can be first to comment this post!

Write a Comment

Your e-mail address will not be published.
Required fields are marked*