കോതാടിന്റെ ഹൃദയത്തില്‍ മാടവനയുടെ സ്‌നേഹവീട്
എറണാകുളം: പ്രളയത്തില്‍ വീട് നഷ്ടപ്പെട്ട കോതാട് നടക്കാപ്പറമ്പില്‍ ജോസഫിനും കുടുംബത്തിനും മാടവന സെന്റ് സെബാസ്റ്റ്യന്‍ ഇടവക നിര്‍മ്മിച്ചുനല്‍കിയ സ്‌നേഹവീടിന്റെ താക്കോല്‍ ദാനം ജനുവരി 23ന് വരാപ്പുഴ മെത്രാപ്പോലീത്ത ഡോ. ജോസഫ് കളത്തില്‍പറമ്പില്‍ നിര്‍വ്വഹിച്ചു. ഇടവകയിലെ ഈ വര്‍ഷത്തെ തിരുനാള്‍ നടത്തുന്ന സെന്റ് ആന്റണീസ് മരണാവശ്യസഹായ സംഘത്തിലെ നൂറ് പ്രസുദേന്തിമാര്‍ തങ്ങളുടെ ആഘോഷങ്ങള്‍ ലളിതമാക്കി സ്വരൂപിച്ച തുകയും ഇടവകയിലെ വിശ്വാസി സമൂഹത്തിന്റെ സഹകരണവും ഒത്തുചേര്‍ന്നപ്പോള്‍ പ്രളയത്തില്‍ വീടും വിലപ്പെട്ടതുമെല്ലാം ഒഴുകിപ്പോയ ഒരു കുടുംബത്തിന് സ്‌നേഹ ഭവനം ഒരുങ്ങുകയായിരുന്നു.
പ്രളയത്തില്‍ ദുരിതമനുഭവിക്കുന്നവര്‍ക്ക് സഹായം ചെയ്യുന്ന കാര്യം ചര്‍ച്ചയായപ്പോള്‍ ഒരു വീട് തന്നെ നിര്‍മ്മിച്ചുനല്‍കിയാലോ എന്ന വികാരി ഫാ. സെബാസ്റ്റിയന്‍ മൂന്നുകൂട്ടങ്കലിന്റെ ആശയം ഇടവക്കാര്‍ ഏറ്റെടുക്കുകയായിരുന്നു. കെഎല്‍എം ന്റെ നേതൃത്വത്തിലുള്ള നിര്‍മ്മാണ തൊഴിലാളികളും ഇടവക ജനങ്ങളും ഞായറാഴ്ചകളിലും മറ്റ് ഒഴിവ് ദിനങ്ങളിലും നിസ്വാര്‍ത്ഥ സേവനം നടത്തി. സാമ്പത്തികമായും നിര്‍മ്മാണ സാമഗ്രികള്‍ എത്തിച്ചുകൊടുത്തും സഹായിച്ചവരുമുണ്ട്.
വീടിന്റെ നിര്‍മ്മാണം തുടങ്ങി 90 ദിവസത്തിനുള്ളില്‍ പണി പൂര്‍ത്തിയാക്കാന്‍ സാധിച്ചു. ആര്‍ച്ച്ബിഷപ് എമരിറ്റസ് ഡോ. ഫ്രാന്‍സീസ് കല്ലറയ്ക്കല്‍ ഭവനം ആശീര്‍വ്വദിച്ചു. മാടവനയിലെ വിശ്വാസി സമൂഹത്തിന്റെ കൂട്ടായ്മയും ഐക്യവും പ്രാര്‍ത്ഥനയുമാണ് ഇത്തരം നന്മ പ്രവൃത്തികള്‍ക്ക് പ്രചോദനമാകുന്നതെന്ന് സംരംഭത്തിന് ചുക്കാന്‍ പിടിച്ച ഫാ. സെബാസ്റ്റ്യന്‍ മൂന്നുകൂട്ടുങ്കല്‍ പറഞ്ഞു.
ഇടവകയിലെ കുഞ്ഞുങ്ങള്‍ കഴിഞ്ഞ മൂന്നു മാസക്കാലമായി തങ്ങളുടെ ജന്മദിന ആഘോഷ തുകയും തങ്ങള്‍ക്ക് കിട്ടുന്ന പോക്കറ്റ് മണിയുമെല്ലാം പള്ളിയില്‍ ഏല്‍പ്പിക്കും. ഇങ്ങനെ ലഭിക്കുന്ന തുകയും കൂട്ടിച്ചേര്‍ത്താണ് കോതാട് സ്‌നേഹവീട് ഒരുങ്ങിയത്.
പ്രളയത്തില്‍ സര്‍വ്വതും നഷ്ടമായ കോതാട് സ്വദേശിയായ ജോസഫിനും കുടുംബത്തിനും മാടവനയുടെ സാന്ത്വന സ്പര്‍ശം നല്‍കുന്ന ആശ്വാസം ചെറുതല്ല. എറണാകുളം സോഷ്യല്‍ സര്‍വ്വീസ് സൊസൈറ്റി നടപ്പിലാക്കിവരുന്ന ആര്‍ച്ച്ബിഷപ് സ്‌നേഹവീട് പദ്ധതിയുടെ ഭാഗമായാണ് മാടവന ഭവനനിര്‍മ്മാണത്തിന് മുന്നിട്ടിറങ്ങിയത്.
Related Articles
കാരുണ്യ ഭവനത്തിന് തറക്കല്ലിട്ടു
കോട്ടപ്പുറം: വടക്കന്‍ പറവൂര്‍ വിശുദ്ധ ഡോണ്‍ബോസ്‌കോ ദേവാലയത്തില്‍ മതബോധന വിദ്യാര്‍ത്ഥികള്‍ ഭവനം ഇല്ലാത്ത നിര്‍ധന വിദ്യാര്‍ഥികള്‍ക്കായി നിര്‍മിച്ചുനല്‍കുന്ന കാരുണ്യ ഭവനത്തിന് കോട്ടപ്പുറം രൂപത മത ബോധന
പിന്നോക്ക വിഭാഗങ്ങളുടെ അവകാശങ്ങൾ ഹനിക്കപ്പെടുന്നു
എയ്ഡഡ് അധ്യാപക നിയമനങ്ങൾ അംഗീകരിക്കുന്നതിന് വേണ്ടി കെസിബിസി വിദ്യാഭ്യാസ സമിതിയും ടീച്ചേഴ്സ് ഗിൽഡ് ന്റെയും ആഭിമുഖ്യത്തിൽ നടന്നുവരുന്ന ഉപവാസ സമരത്തിന്റെ ഭാഗമായി നെയ്യാറ്റിൻകര ടീച്ചേഴ്സ് ഗിൽഡിന്റെ ആഭിമുഖ്യത്തിൽ
തീരത്തിന്റെ ഈണമുള്ള സങ്കീര്‍ത്തനം പോലെ
ബെന്നി പി. നായരമ്പലം-അന്നാ ബെന്‍ അഭിമുഖം തയ്യാറാക്കിയത് ജയിംസ് അഗസ്റ്റിന്‍ 1988-ലെ ഒരു സന്ധ്യ. വരാപ്പുഴ അതിരൂപതയുടെ വാടേല്‍ ഇടവകയുടെ ഉപകേന്ദ്രമായ മാനാട്ടുപറമ്പ് കപ്പേളയില്‍ ഒരു ഹാസ്യനാടകത്തിന്
