Breaking News
സ്റ്റാന്‍ സ്വാമിക്കു കിട്ടാത്ത നീതി
ഇന്ത്യന്‍ ഭരണകൂടവും ക്രിമിനല്‍ നീതിന്യായവ്യവസ്ഥയും ദേശീയ അന്വേഷണ ഏജന്‍സിയും ചേര്‍ന്ന് ജുഡീഷ്യല്‍ കസ്റ്റഡിയില്‍ നിഷ്ഠുരമായി, ഇഞ്ചിഞ്ചായി കൊന്ന ഫാ. സ്റ്റാന്‍ സ്വാമിയുടെ
...0ഒടുങ്ങാത്ത അഗ്നിപരീക്ഷകള്‍
അമേരിക്കയും റഷ്യയും ഇസ്രയേലും ഫ്രാന്‍സും യുകെയും ജര്‍മ്മനിയും ചൈനയുമൊക്കെ നടപ്പാക്കിയിട്ടുള്ള ഹ്രസ്വകാല സൈനികസേവന സമ്പ്രദായം ഇന്ത്യയിലെ കര, നാവിക, വ്യോമസേനകളില് ഓഫിസര്‍
...0മലയോര ജനപദങ്ങളുടെ ആവാസവ്യവസ്ഥയോ?
രാജസ്ഥാനിലെ ഒരു വന്യജീവിസങ്കേതത്തിലെ ഖനനത്തില്‍ നിന്നു തുടങ്ങി നീലഗിരിയിലെ വനസംരക്ഷണപ്രശ്‌നത്തില്‍ വരെ എത്തിയ നിയമപോരാട്ടങ്ങളുടെ പശ്ചാത്തലത്തിലാണ് രാജ്യത്ത് സംരക്ഷിത വനങ്ങളിലെ വന്യജീവിസങ്കേതങ്ങള്‍ക്കും
...0മലബാറിന്റെ പുണ്യ മഹാമേരു
പോര്‍ച്ചുഗീസുകാര്‍ പതിനഞ്ചാം നൂറ്റാണ്ടിനൊടുവില്‍ മലബാറിലെത്തുമ്പോള്‍, ജറുസലേമില്‍ നിന്നു കുടിയേറിയ യഹൂദക്രൈസ്തവരായ എസ്സീന്യരും ബാബിലോണ്‍ കുടിയേറ്റക്കാരായ നസ്രാണികളും പേര്‍ഷ്യയില്‍ നിന്നു കുടിയേറിയ മാര്‍തോമാക്രിസ്ത്യാനികളും
...0തൃക്കാക്കര വിധിതീര്‍പ്പ് അതിനിര്‍ണായകം
രണ്ടാം പിണറായി സര്‍ക്കാരിന്റെ ‘ഉറപ്പോടെ മുന്നോട്ട്’ (പറഞ്ഞത് നടപ്പാക്കും) എന്ന ഒന്നാം വാര്‍ഷിക പ്രോഗ്രസ് റിപ്പോര്‍ട്ട് ജൂണ്‍ രണ്ടിന് സാഘോഷം പുറത്തിറങ്ങും
...0നവകേരളത്തിന്റെ വിശാല മാനിഫെസ്റ്റോ
രാജ്യത്തെ ഏറ്റവും വലിയ ഇടതുപക്ഷ പ്രസ്ഥാനമായ മാര്‍ക്‌സിസ്റ്റ് കമ്യൂണിസ്റ്റ് പാര്‍ട്ടിയുടെ സംസ്ഥാന സമ്മേളനത്തില്‍ കേരള മുഖ്യമന്ത്രിയും പൊളിറ്റ് ബ്യൂറോ അംഗവുമായ പിണറായി
...0
ജുഡീഷ്യറിയില്‍ കൈകടത്താന്‍ അനുവദിക്കരുത്
രാജ്യത്തെ ഭരണഘടനയുടെയും ജനാധിപത്യ വ്യവസ്ഥിതിയുടെയും നെടുംതൂണുകളിലൊന്നായ നീതിന്യായ സംവിധാനത്തിന്റെ നിഷ്പക്ഷതയും സ്വാതന്ത്ര്യവും ആപല്‍സന്ധിയിലാണെന്ന ആശങ്ക വര്‍ധിക്കുകയാണ്. ‘യതോ ധര്‍മസ്തതോ ജയഃ’ എന്ന് സത്യത്തിന്റെ വിജയം ഉദ്‌ഘോഷിക്കുന്ന പരമോന്നത നീതിപീഠത്തിലെ ന്യായാധിപന്മാരെയും ഭരണം കയ്യാളുന്ന രാഷ്ട്രീയശക്തികള്‍ വരുതിക്കു നിര്‍ത്താന്‍ ശ്രമിക്കുന്നത് സമഗ്രാധിപത്യ ഭീഷണിയുടെ നഗ്ന നിദര്‍ശനമാണ്.
നിയമനിര്‍മാണസഭയുടെയും ഭരണം നിര്‍വഹിക്കുന്ന സര്‍ക്കാരിന്റെയും നിയന്ത്രണപരിധിക്ക് അതീതമായി പരമാധികാരത്തോടെ, പൂര്‍ണസ്വാതന്ത്ര്യത്തോടെ ഭരണഘടനയെയും പൗരന്റെ മൗലിക അവകാശങ്ങളെയും ‘ഭയമോ വിധേയത്വമോ പക്ഷപാതമോ കൂടാതെ’ സംരക്ഷിക്കാനുള്ള ബാധ്യത നിറവേറ്റുന്നതിന് ജുഡീഷ്യറിയെ പ്രാപ്തമാക്കുന്ന ഘടകങ്ങളില്‍ ഏറ്റവും നിര്‍ണായകമാണ് ജഡ്ജിമാരുടെ നിയമനപ്രക്രിയയും യോഗ്യതാമാനദണ്ഡങ്ങളും. ഉന്നത നീതിന്യായക്കോടതി നിയമനങ്ങള്‍ ‘കൂടുതല്‍ സുതാര്യമാക്കുക’ എന്ന പ്രഖ്യാപിത ലക്ഷ്യത്തോടെ ദേശീയ കമ്മീഷന്‍ സംവിധാനം കൊണ്ടുവരാനുള്ള രാഷ്ട്രീയ നീക്കങ്ങള്‍ പാളിപ്പോയ പശ്ചാത്തലത്തില്‍, സുപ്രീം കോടതി ചീഫ് ജസ്റ്റിസും മുതിര്‍ന്ന നാല് ജഡ്ജിമാരും ഉള്‍പ്പെടുന്ന കൊളീജിയം നിശ്ചിത മാനദണ്ഡങ്ങളുടെ അടിസ്ഥാനത്തില്‍ തികച്ചും യോഗ്യരും അര്‍ഹരുമെന്നു വിലയിരുത്തി സര്‍ക്കാരിന്റെ അംഗീകാരത്തിനായി നാമനിര്‍ദേശം ചെയ്യുന്നവരെ നിയമനത്തിനു പരിഗണിക്കുന്ന രീതിയാണ് നിലവിലുള്ളത്.
കഴിഞ്ഞ ജനുവരി 10ന് ഇങ്ങനെ കൊളീജിയം സുപ്രീം കോടതി ജഡ്ജി പദവിയിലേക്ക് ശുപാര്‍ശ ചെയ്ത രണ്ടു പേരുകളില്‍ അദ്യത്തേത് ഉത്തരാഖണ്ഡ് ഹൈക്കോടതി ചീഫ് ജസ്റ്റിസ് കെ. എം ജോസഫിന്റേതായിരുന്നു; സുപ്രീം കോടതിയിലെ മുതിര്‍ന്ന അഭിഭാഷക ഇന്ദു മല്‍ഹോത്രയാണ് ഒപ്പം നിര്‍ദേശിക്കപ്പെട്ടത്. മൂന്നു മാസത്തോളം നടപടി വച്ചുനീട്ടിയശേഷം, ഇന്ദു മല്‍ഹോത്രയ്ക്ക്-ബാറില്‍ നിന്ന് നേരിട്ട് സുപ്രീം കോടതി ജഡ്ജിയാകുന്ന പ്രഥമ വനിത-നിയമന ഉത്തരവ് നല്‍കിയ കേന്ദ്ര ഗവണ്‍മെന്റ് ജസ്റ്റിസ് ജോസഫ് സ്വീകാര്യനല്ല എന്ന നിലപാടാണ് കൈക്കൊണ്ടത്. അദ്ദേഹത്തെ ശുപാര്‍ശ ചെയ്തത് പുനഃപരിശോധിക്കണമെന്നാവശ്യപ്പെട്ട് കേന്ദ്ര നിയമമന്ത്രി സുപ്രീം കോടതി ചീഫ് ജസ്റ്റിസിന് അയച്ച കത്തില്‍, കേരളത്തിന് സുപ്രീം കോടതിയില്‍ പ്രാതിനിധ്യമുണ്ടെന്നും അഖിലേന്ത്യാ സീനിയോറിറ്റി പട്ടികയില്‍ കെ. എം ജോസഫ് 42-ാം സ്ഥാനക്കാരനാണെന്നും അദ്ദേഹത്തെക്കാള്‍ സീനിയറായ 11 ഹൈക്കോടതി ചീഫ് ജസ്റ്റിസുമാരുണ്ടെന്നും, രാജ്യത്തെ മൂന്നു ഹൈക്കോടതികളില്‍ ചീഫ് ജസ്റ്റിസുമാര്‍ മലയാളികളാണെന്നും, പല സംസ്ഥാനങ്ങള്‍ക്കും പരമോന്നത കോടതിയില്‍ പ്രാതിനിധ്യമില്ലെന്നും, പട്ടികജാതി-വര്‍ഗക്കാരില്‍ നിന്ന് ആരെയും നിര്‍ദേശിക്കാത്തത് പോരായ്മയാണെന്നും മറ്റും വിശദീകരിച്ചിരുന്നു.
എന്നാല്‍ ജസ്റ്റിസ് ജോസഫിനോട് വിവേചനം കാട്ടുന്നത് രാഷ്ട്രീയ പകപോക്കലാണെന്നാണ് പ്രമുഖരായ പല നിയമജ്ഞരും നിരീക്ഷകരും പ്രതിപക്ഷ കക്ഷികളും വിലയിരുത്തിയത്. ഉത്തരാഖണ്ഡില്‍ 2016 ഏപ്രിലില്‍ രാഷ്ട്രപതി ഭരണം റദ്ദാക്കി ഹരീഷ് റാവത്തിന്റെ നേതൃത്വത്തിലുള്ള കോണ്‍ഗ്രസ് സര്‍ക്കാരിനെ വീണ്ടും അധികാരത്തിലെത്തിച്ച ജസ്റ്റിസ് ജോസഫിന്റെ ചരിത്രപ്രധാനമായ വിധി ബിജെപിക്കുകനത്ത തിരിച്ചടിയായിരുന്നു. അതുകൊണ്ടാണ് ജസ്റ്റിസ് ജോസഫ് മോദി സര്‍ക്കാരിന് അനഭിമതനാകുന്നത്.
ഹൃദ്രോഗത്തിന് ബൈപാസ് സര്‍ജറിക്കു വിധേയനായ ജസ്റ്റിസ് ജോസഫിനെ ഉത്തരാഖണ്ഡിലെ കൊടുംശൈത്യത്തിന്റെ പ്രതികൂല കാലാവസ്ഥയില്‍ നിന്ന് ആന്ധ്രപ്രദേശ്-തെലങ്കാന ഹൈക്കോടതിയിലേക്കു സ്ഥലംമാറ്റുന്നതിന് 2016 മേയില്‍ കോളീജിയം ശുപാര്‍ശ ചെയ്തതാണ്. സാധാരണ ഗതിയില്‍ പത്തു ദിവസത്തിനകം നടപടിയുണ്ടാകേണ്ടതാണ്. എന്നാല്‍ ഇതുവരെ കേന്ദ്ര ഗവണ്‍മെന്റ് ആ ശുപാര്‍ശ പരിഗണിച്ചിട്ടില്ല.
അഖിലേന്ത്യാ തലത്തില്‍ ഹൈക്കോടതികളിലെ ചീഫ് ജസ്റ്റിസുമാരുടെയും മുതിര്‍ന്ന ജഡ്ജിമാരുടെയും സീനിയോറിറ്റിയും യോഗ്യതയും സത്യസന്ധതയും പരിഗണിക്കുമ്പോള്‍ തന്നെ, സുപ്രീം കോടതി ജഡ്ജിയാകാന്‍ ‘സര്‍വഥാ യോഗ്യനും അര്‍ഹനുമാണ്’ ജസ്റ്റിസ് കെ. എം ജോസഫ് എന്നാണ് ചീഫ് ജസ്റ്റിസ് ദീപക് മിശ്രയും ജസ്റ്റിസുമാരായ ജെ. ചെലമേശ്വര്‍, രഞ്ജന്‍ ഗൊഗോയ്, മദന്‍ ബി. ലോക്കൂര്‍, കുര്യന്‍ ജോസഫ് എന്നിവരും ഉള്‍പ്പെടുന്ന കൊളീജിയം ജനുവരിയില്‍ ഐകകണ്‌ഠ്യേന ശുപാര്‍ശ ചെയ്തത്. സീനിയോറിറ്റി മാത്രമല്ല മാനദണ്ഡം എന്ന് കോളീജിയം വ്യക്തമാക്കിയതാണ്. ജസ്റ്റിസ് ജോസഫ് ഉത്തരാഖണ്ഡ് ചീഫ് ജസ്റ്റിസായി ചുമതലയേറ്റത് 2014 ജൂലൈ 31ന് ആണ്. അതിനുശേഷം രണ്ടു വര്‍ഷമെങ്കിലും കഴിഞ്ഞു ചുമതലയേറ്റവരാണ് നിലവില്‍ മറ്റു ഹൈക്കോടതികളില്‍ ചീഫ് ജസ്റ്റിസുമാരായിരിക്കുന്നവരെല്ലാം എന്നതാണ് യാഥാര്‍ഥ്യം.
കേരള ഹൈക്കോടതിയുടെ പ്രതിനിധിയായി സുപ്രീം കോടതിയില്‍ ഇപ്പോഴുള്ളത് ജസ്റ്റിസ് കുര്യന്‍ ജോസഫാണ്. അദ്ദേഹം അടുത്ത നവംബറില്‍ വിരമിക്കും. കേരള ഹൈക്കോടതി ജഡ്ജിമാരുടെ മൊത്തം സംഖ്യ 21 മാത്രമായിരുന്ന കാലത്ത് സുപ്രീം കോടതിയില്‍ രണ്ടു മലയാളികള്‍ – ജസ്റ്റിസ് കെ.എസ്. പരിപൂര്‍ണന്‍, ജസ്റ്റിസ് കെ.ടി. തോമസ് – ഉണ്ടായിരുന്നു. പിന്നീട് ജസ്റ്റിസ് കെ.ജി. ബാലകൃഷ്ണന്‍, സിറിയക് ജോസഫ്, കെ.എസ്.പി. രാധാകൃഷ്ണന്‍ എന്നിവര്‍ ഒരേസമയം സുപ്രീം കോടതിയില്‍ ജഡ്ജിമാരായിരുന്നു. കേരളത്തില്‍ നിന്ന് ഇപ്പോള്‍ ഒരു ജഡ്ജി കൂടി പരമോന്നത നീതിപീഠത്തിലെത്തിയാല്‍ അത് അമിത പ്രാതിനിധ്യമാകും എന്ന കേന്ദ്രമന്ത്രിയുടെ വാദത്തില്‍ ഒരു യുക്തിയുമില്ല. കേരള ഹൈക്കോടതി ചീഫ് ജസ്റ്റിസ് ആന്റണി ഡൊമിനിക് അടുത്തുതന്നെ വിരമിക്കും.
സുപ്രീം കോടതി ജഡ്ജിമാരുടെ നിര്‍ദിഷ്ട അംഗസംഖ്യ 31 ആണ്. ഇപ്പോള്‍ 25 പേരാണുള്ളത്. ഇതില്‍ ആറുപേര്‍ ഇക്കൊല്ലം വിരമിക്കും. അങ്ങനെ 12 ഒഴിവുകളാണുണ്ടാവുക. ഇതിലേക്ക് പട്ടികജാതി-വര്‍ഗത്തില്‍ നിന്നോ പ്രാതിനിധ്യമില്ലാത്ത മറ്റു സംസ്ഥാനങ്ങളിലെ ഹൈക്കോടതികളില്‍ നിന്നോ യോഗ്യരായവരെ കണ്ടെത്തുന്നതില്‍ ജസ്റ്റിസ് ജോസഫ് എന്നൊരാളുടെ സാന്നിധ്യം തടസമാകേണ്ട കാര്യമില്ല.
എന്തായാലും, കൊളീജിയം ഒറ്റക്കെട്ടായി നിന്ന് വീണ്ടും ജസ്റ്റിസ് ജോസഫിന്റെ പേരുതന്നെ മുന്നോട്ടുവച്ചാല്‍ സര്‍ക്കാരിന് അത് അംഗീകരിക്കേണ്ടിവരും എന്നതാണ് കീഴ്‌വഴക്കം. എന്നാല്‍ നിയമന ഉത്തരവ് കുറെക്കാലത്തേക്ക് നീട്ടിക്കൊണ്ടുപോകാന്‍ കഴിഞ്ഞേക്കും.
സുപ്രീം കോടതി ചീഫ് ജസ്റ്റിസ് ദീപക് മിശ്രയെ കുറ്റവിചാരണ ചെയ്ത് സ്ഥാനഭ്രഷ്ടനാക്കാനുള്ള പ്രതിപക്ഷ പാര്‍ട്ടികളുടെ നോട്ടീസ് രാജ്യസഭാധ്യക്ഷന്‍ കൂടിയായ ഉപരാഷ്ട്രപതി വെങ്കയ്യ നായിഡു തള്ളിയെങ്കിലും ഇന്ത്യയുടെ നീതിന്യായ ചരിത്രത്തിലെ അത്യപൂര്‍വ പ്രതിസന്ധി ഇപ്പോഴും നീറിപ്പുകഞ്ഞുനില്‍ക്കുകയാണ്. സുപ്രീം കോടതിയുടെ സ്വാതന്ത്ര്യവും നിലനില്പും മറ്റ് അടിസ്ഥാനപ്രശ്‌നങ്ങളും ചര്‍ച്ച ചെയ്യാന്‍ എല്ലാ ജഡ്ജിമാരുടെയും സമ്പൂര്‍ണ സമ്മേളനം വിളിച്ചുചേര്‍ക്കണമെന്ന് കോളീജിയം അംഗങ്ങളായ ജസ്റ്റിസ് രഞ്ജന്‍ ഗൊഗോയ്, മദന്‍ ബി. ലോക്കൂര്‍ എന്നിവര്‍ ചീഫ് ജസ്റ്റിസിന് കത്തെഴുതിയിരുന്നു. ജഡ്ജി നിയമനത്തിന്റെ കാര്യത്തില്‍ കേന്ദ്ര സര്‍ക്കാരിന് വഴങ്ങിക്കൊടുക്കണമെന്ന തരത്തില്‍ കോളീജിയത്തില്‍ ഭിന്നാഭിപ്രായമുണ്ടായാല്‍ അതിന്റെ പ്രത്യാഘാതം പ്രവചനാതീതമായിരിക്കും.
Related Articles
വിവാഹ കൂദാശയിലും ഇടങ്കോലിടുമ്പോള്‍
വ്യക്തിനിയമങ്ങളും വിശ്വാസപ്രമാണങ്ങളും മതാചാരങ്ങളും സിവില്‍ ജൂറിസ്പ്രൂഡന്‍സിന് അതീതമായ ദൈവികനിയമവുമായി ബന്ധപ്പെട്ട കാര്യങ്ങളില്‍ മതനിരപേക്ഷ ജനാധിപത്യ ഭരണസംവിധാനം ഇടപെടുന്നതിന് തക്കതായ കാരണങ്ങളുണ്ടാകണം. ഏതെങ്കിലും ഒരു ജനവിഭാഗത്തിന്റെ സാമൂഹികക്ഷേമത്തിനും നിയമപരമായ
ബജറ്റ് പ്രഖ്യാനത്തിന് എന്തു പഞ്ഞം!
കൊവിഡാനന്തര കേരളത്തിന്റെ വികസന മുന്‍ഗണനകളുടെയും മുന്‍കൈകളുടെയും രൂപരേഖ എന്ന ആമുഖത്തോടെ ധനമന്ത്രി ടി.എം. തോമസ് ഐസക് അവതരിപ്പിച്ച സംസ്ഥാന ബജറ്റ് ആസന്നമായ നിയമസഭാ തിരഞ്ഞെടുപ്പിനുള്ള പ്രകടനപത്രികയുടെ
തീരശോഷണത്തിന് ശാശ്വത പരിഹാരം തേടണം
ആര്‍ക്കും പ്രവചിക്കാവുന്ന ചാക്രിക പ്രതിഭാസമാണ് കാലവര്‍ഷവും കടല്‍ക്ഷോഭവും തീരദേശ ജനതയുടെ പ്രാണനൊമ്പരവും. ദീര്‍ഘകാല പരിപ്രേഷ്യത്തോടുകൂടി പ്രകൃതിദുരന്താഘാത പ്രതിരോധശേഷിയുള്ള പശ്ചാത്തല സൗകര്യങ്ങള്‍ ഒരുക്കി കേരളം പുനര്‍നിര്‍മിച്ചുകൊണ്ടിരിക്കുന്നതായി ‘പ്രത്യേക മാനസികാവസ്ഥയുള്ള’
