ദേവസ്‌തവിളി സംഘങ്ങളെ ആശിര്‍വദിച്ച്‌ കൃപാസനം
ആലപ്പുഴ: മൂവായിരത്തി അഞ്ഞൂറ്‌ കൊല്ലത്തോളം പഴക്കമുള്ള ദേവസ്‌തവിളി സമ്പ്രദായം പ്രോത്സാഹിപ്പിക്കുന്നതിന്‌ ദേവസ്‌തവിളി സംഘങ്ങള്‍ക്ക്‌ ഈ വലിയ നോമ്പുകാലത്ത്‌ മരക്കുരിശും മണിയും വാഴ്‌ത്തി നല്‍കുന്ന ചടങ്ങ്‌ കലവൂര്‍ കൃപാസനം ദേശീയ പൈതൃക പഠനകേന്ദ്രത്തില്‍ ഡയറക്‌ടര്‍ ഫാ. വി. പി ജോസഫ്‌ വലിയവീട്ടില്‍ ഭദ്രദീപം തെളിച്ച്‌ ഉദ്‌ഘാടനം ചെയ്‌തു. സംഘങ്ങളെ കുരിശും മാലയും അണിയിച്ചു.അരൂര്‍, എടവനക്കാട്‌, പള്ളിത്തോട്‌, വൈപ്പിന്‍, അര്‍ത്തുങ്കല്‍, തൈക്കല്‍, വാടയ്‌ക്കല്‍, ഓമനപ്പുഴ, ചെത്തി, കാട്ടൂര്‍, ചേന്നവേലി, പുന്നപ്ര എന്നീ തീരദേശങ്ങളില്‍ നിന്നുള്ള പന്ത്രണ്ടോളം ദേവസ്‌തവിളി സംഘങ്ങള്‍ പ്രത്യേക വ്രതാനുഷ്‌ഠാന പ്രാര്‍ത്ഥന ചൊല്ലിക്കൊണ്ട്‌ തങ്ങളുടെ പ്രേഷിതദൗത്യം ഏറ്റെടുത്തു. ഫാ. ബ്രിട്ടാസ്‌ കടവുങ്കല്‍ യോഗത്തില്‍ അദ്ധ്യക്ഷനായിരുന്നു. കൃപാസനം വൈസ്‌ ഡയറക്‌ടര്‍ തങ്കച്ചന്‍ പനയ്‌ക്കല്‍, നെയ്‌തല്‍ കള്‍ച്ചറല്‍ സെക്രട്ടറി സിമി ഷിനു എന്നിവര്‍ പ്രസംഗിച്ചു. അഡ്വ. എഡ്വേര്‍ഡ്‌ തുറവൂര്‍, സണ്ണി പരുത്തിയില്‍, രതീഷ്‌ ബാബു തകഴി, ടിജോ ടി. ചാക്കോ, ടി. എക്‌സ്‌ പീറ്റര്‍ എന്നിവര്‍ ചടങ്ങിന്‌ നേതൃത്വം നല്‍കി.
എന്താണ്‌ ദേവസ്‌തവിളി ?
വസ്‌തേ എന്നത്‌ ഒരു പോര്‍ച്ചുഗീസ്‌ പദമാണ്‌. ഒഴിപ്പിക്കുക, വിശുദ്ധീകരിക്കുക എന്നൊക്കെയാണ്‌ ഇതിനര്‍ത്ഥം. നാട്ടിലെ ദുഷ്‌ടശക്തികളെ ഒഴിപ്പിച്ച്‌ സമൂഹത്തില്‍ ആത്മവിശുദ്ധി പരത്തുന്നതിനുവേണ്ടിയാണ്‌ ദേവസ്‌തവിളി അനുഷ്‌ഠിക്കുന്നത്‌.
ഏകദേശം 3,500 വര്‍ഷങ്ങള്‍ക്കു മുന്‍പ്‌ യഹൂദ വിശ്വാസ സമൂഹത്തിനുള്ളില്‍ രൂപപ്പെട്ടുവന്ന `ക്ഷേമ’ പ്രാര്‍ത്ഥന എന്ന പ്രഘോഷണ വിളി സമ്പ്രദായത്തില്‍ നിന്നാണ്‌ ഇതിന്റെ ഉത്ഭവം. 16-ാം നൂറ്റാണ്ടിന്റെ ഉത്തരാര്‍ദ്ധത്തില്‍ കേരളത്തിന്റെ തീരപ്രദേശങ്ങളില്‍ മിഷണറിമാരാണ്‌ ഈ സമ്പ്രദായം രൂപപ്പെടുത്തിയത്‌.
ക്ഷേമപ്രാര്‍ത്ഥനയുടെ അനുഷ്‌ഠാന ഉദ്ദേശ്യം തന്നെയാണ്‌ ദേവസ്‌തവിളിയിലൂടെ സമൂഹത്തിന്‌ കൈവരുന്നത്‌. `ക്ഷേമ’ പ്രാര്‍ത്ഥനയിലും, ദേവസ്‌ത വിളിയിലും പ്രഘോഷിക്കപ്പെടുന്ന ആത്മവിശുദ്ധീകരണ വിശ്വാസസത്യങ്ങളുടെ പ്രഘോഷണം, ക്രിസ്‌തുവിന്‌ 1250 വര്‍ഷം മുന്‍പ്‌ മോശ നല്‍കിയ പത്തു കല്‍പ്പനയുടെ അന്തസ്സത്ത തന്നെയാണ്‌.
ഇസ്രയേല്‍ കേള്‍ക്കുക, നിന്റെ ദൈവമായ കര്‍ത്താവ്‌ ഏകനാകുന്നു. `ക്ഷേമ എലോഹിം അഡോണായ്‌’ എന്ന യഹൂദന്റെ ആലാപന വിളിരൂപത്തിന്റെ ഇസ്ലാമിക സമാന്തരമാണ്‌ `അല്ലാഹു അക്‌ബര്‍’ എന്ന ബാങ്കു വിളിയിലും മുഴങ്ങുന്നത്‌. അതിന്റെ ക്രിസ്‌തീയ സമാന്തരമായിട്ടാണ്‌ `പരമണ്ഡലത്തില്‍ ഇറുക്കും എങ്കള്‍ പിതാവേ’ എന്ന്‌ എട്ടു ദിക്കും പൊട്ടുമാറുച്ചത്തില്‍ നട്ടപ്പാതിരാനേരം നീട്ടി വിളിക്കുന്ന പുരാതന ദേവസ്‌ത വിളി രൂപത്തിലും മുഴങ്ങുന്നത്‌. “ആകാശങ്ങളിലിരിക്കുന്ന ഞങ്ങളുടെ ബാവാ” എന്ന്‌ പിന്നീട്‌ ഈ സൂക്തത്തിന്‌ മൊഴിമാറ്റം സംഭവിച്ചിട്ടുണ്ട്‌.
Related Articles
ആലപ്പുഴ തിരുഹൃദയ സെമിനാരിക്ക് 150 വയസ്സ്
കേരളത്തില്‍ ത്രിതല പഞ്ചായത്ത് സംവിധാനത്തിലൂടെ താഴെത്തട്ടില്‍ അധികാര പങ്കാളിത്തം സംജാതമാക്കിയ ചരിത്ര സംഭവം കാല്‍നുറ്റാണ്ട് പൂര്‍ത്തിയായ വേളയിലാണ് ഒരുപറ്റം വിശ്വാസികള്‍ തങ്ങളുടെ മക്കള്‍ക്കായി പ്രതിബദ്ധതയോടെ ആലപ്പുഴ പട്ടണത്തില്‍
കൊച്ചിയുടെ പൈതൃക സ്മാരകങ്ങൾ സംരക്ഷിക്കണം
തോപ്പുംപടി: ഫോർട്ടുകൊച്ചിയിൽ പൈതൃക മേഖലയെ തിരിച്ചറിയാനും സഞ്ചാരികളെ സ്വാഗതം ചെയ്യുവാനുമായി ഈ മേഖലയിൽ പൈതൃക സ്വാഗത കവാടം (ഹെറിറ്റേജ് ഗെയ്റ്റ് ) നിർമ്മിക്കണമെന്ന് കൊച്ചി രൂപത
പ്രളയക്കെടുതിക്ക് പുറകെ മത്സ്യരോഗവും; കര്‍ഷകര്‍ക്ക് ജാഗ്രതാ നിര്‍ദ്ദേശം
എറണാകുളം: പ്രളയക്കെടുതിക്ക് ശേഷം മലബാര്‍ പ്രദേശങ്ങളിലും എറണാകുളം ജില്ലയിലെ വൈപ്പിനിലും കൊല്ലം ജില്ലയിലെ മണ്‍റോ തുരുത്തിലും ഉള്‍നാടന്‍ ജലാശയ മത്സ്യങ്ങളില്‍ വ്യാപകമായി രോഗബാധ കണ്ടെത്തിയിട്ടുള്ളതിനാല്‍ മത്സ്യകര്‍ഷകര്‍ ജാഗ്രത
