പടച്ചോന്റെ ദൂതന്‍ നൗഷാദ് ഇക്കയുടെ കട

22 Aug, 2019 by admin

Print this article Font size -16+

2018, 2019 ആഗസ്റ്റ് മാസത്തില്‍ തുടര്‍ച്ചയായി വെള്ളപ്പൊക്കവും പ്രകൃതിക്ഷോഭവും നേരിട്ട സംസ്ഥാനമാണ് നമ്മുടേത്. 2018ലെ പ്രളയത്തില്‍ കേരളമാകെ ഒന്നിച്ചുനിന്നു. മുഖ്യമന്ത്രിയുടെ ദുരിതാശ്വാസഫണ്ട് നിറഞ്ഞുകവിഞ്ഞൊഴുകി. ജനങ്ങള്‍ നിര്‍ലോപം സഹകരിക്കുകയും സഹായിക്കുകയും ചെയ്തു. 2019ല്‍ ദുരന്തമുഖത്ത് ആശ്വാസത്തിനെത്തിയത് സന്നദ്ധസംഘടനകളും വ്യക്തികളുമായിരുന്നു. മാധ്യമങ്ങള്‍ മുഖ്യമന്ത്രിയോട് ചോദിക്കുന്നു, ഇത്തവണ സാലറി ചലഞ്ച് ഉണ്ടാകുമോ? സാലറി ചലഞ്ചിനെപ്പറ്റി ആലോചിച്ചിട്ടില്ല. ചില പെന്‍ഷന്‍കാരും ജീവനക്കാരും ചോദിക്കാതെ തന്നെ ദുരിതാശ്വാസനിധിയിലേക്ക് സംഭാവന നല്‍കിയിട്ടുണ്ട്. മന്ത്രിമാര്‍ അവരുടെ ഒരു മാസത്തെ ശമ്പളവും അലവന്‍സും ചേര്‍ത്ത് ഒരു ലക്ഷം രൂപ വീതം നല്‍കാമെന്ന് ഏറ്റിട്ടുണ്ട്. കഴിഞ്ഞ പ്രളയകാലത്ത് സാലറി ചലഞ്ചില്‍ പങ്കെടുക്കാത്ത സര്‍ക്കാര്‍ ജീവനക്കാര്‍ക്ക് ഒരു മാസത്തെ ശമ്പളം ദുരിതാശ്വാസനിധിയിലേക്ക് സംഭാവന നല്‍കാനുള്ള സുവര്‍ണാവസരമാണിത്.
2018ലെ ദുരന്തത്തില്‍ എല്ലാം നഷ്ടപ്പെട്ടവര്‍ക്കും അര്‍ഹതപ്പെട്ടവര്‍ക്കും സഹായം ലഭിച്ചോ എന്ന ചോദ്യത്തിന് ആധികാരികതയില്ലാത്ത കണക്കുകള്‍ നിരത്തി തടിതപ്പും. വി.ഡി.സതീശന്‍ എംഎല്‍എയുടെ ചോദ്യങ്ങള്‍ക്കുപോലും മുഖ്യമന്ത്രിക്ക് മറുപടിയുണ്ടായിരുന്നില്ല. ”കഴിഞ്ഞ കൊല്ലത്തെ മഹാപ്രളയത്തിനും മലയിടിച്ചിലിനും കാരണം കണ്ടെത്താതെ അതിന് ഉത്തരവാദികളായവരെ സംരക്ഷിക്കാനാണ് മുഖ്യമന്ത്രി ശ്രമിക്കുന്നത്. കേരളം അപകടമേഖലയാണെന്ന് തിരിച്ചറിഞ്ഞ് നേരിടാന്‍ ശ്രമിക്കാതെ ഒരു കൊല്ലം സര്‍ക്കാര്‍ നഷ്ടപ്പെടുത്തി. അതിന്റെ ദുരന്തം അനുഭവിക്കുന്നത് പാവം ജനങ്ങള്‍. ഡാമുകള്‍ ഒരുമിച്ചു തുറന്നതല്ല കാരണമെന്ന് ആവര്‍ത്തിച്ചു പറയുമ്പോള്‍, നുണ നൂറുപ്രാവശ്യം പറഞ്ഞാല്‍ നേരാവില്ല.”
എമ്പ്രാന്തിരി കട്ടാല്‍ അമ്പലവാസികളൊക്കെ കക്കും. പെന്‍ഷന്‍കാരില്‍നിന്നും ജീവനക്കാരില്‍നിന്നും വൈദ്യുതി ബോര്‍ഡ് പിരിച്ചത് 132.23 കോടി രൂപ. വിവാദമായപ്പോള്‍ ബാക്കി തുക മുഖ്യമന്ത്രിയെ ഏല്‍പിച്ചു. മുറുമുറുപ്പോടെ ബോര്‍ഡ് പറയുന്നുണ്ട്, സര്‍ക്കാര്‍ ഞങ്ങള്‍ക്ക് 541.79 കോടി തരാനുണ്ട്. 200 കോടി രൂപയുടെ കമ്മി നേരിടുകയും വേണം. രണ്ടു ദുരന്തങ്ങളിലുമായി ബോര്‍ഡിന് കനത്ത നഷ്ടമുണ്ടായിട്ടുണ്ട്.
സത്യത്തില്‍ സര്‍ക്കാരിന്റെ ദുരിതാശ്വാസനിധിയില്‍ എത്ര വരാനുണ്ട്? കണക്കില്‍ എത്രയുണ്ടായിരുന്നു? പല കണക്കുകളാണ് കാണുന്നത്. 1206.38 കോടി. വിവരാവകാശ കമ്മീഷന്‍ വഴി ലഭിച്ച മറുപടി 1499 കോടി. അപ്പോള്‍ 292.61 കോടി എവിടെപ്പോയി? ചില’വാ’യില്‍ പോയി എന്നു വിശ്വസിക്കേണ്ടതായിവരും. അതെ, ചെലവിന്റെ കാര്യത്തിലും അവ്യക്തത സുതാര്യതയെ വിഴുങ്ങും?
രാഷ്ട്രീയത്തില്‍ ഉന്നത സ്വാധീനവും പണത്തിന്റെ കരുത്തും ആള്‍ബലവുമുണ്ടെങ്കില്‍ പി.വി.അന്‍വറിന്റെ തടയണയും പാര്‍ക്കും പ്രകൃതിലോല സ്ഥലത്ത് തലയുയര്‍ത്തി നില്ക്കും. മന്ത്രിമാര്‍ അന്‍വറിന്റെ ചൊല്‍പ്പടിയില്‍ നില്ക്കും. ഇനിയൊരു ദുരന്തം മലപ്പുറത്തെ ചീങ്കണ്ണിപ്പാറയില്‍ സംഭവിക്കുമ്പോള്‍ കുറച്ചുനാള്‍ മാധ്യമങ്ങള്‍ക്ക് ചാകരയാകും. പിന്നെ പതിവുപോലെ നാം എല്ലാം മറക്കും.
ഈ രണ്ടു പ്രളയകാലത്തും ജാഗ്രതയോടെ പ്രവര്‍ത്തിച്ച ആരോഗ്യവകുപ്പിനെ ആദരവോടെ അനുസ്മരിക്കാം. പകര്‍ച്ചവ്യാധികള്‍ വരാതിരിക്കാനും പടരാതിരിക്കാനും കൃത്യസമയത്തുതന്നെ പ്രതിരോധ മരുന്നുകളും വിദഗ്ധ ചികിത്സയും ജനങ്ങളിലെത്തിക്കാനും കഴിയുന്നു എന്നത് ആ വകുപ്പിന്റെയും സംസ്ഥാനത്തിന്റെയും നേട്ടം തന്നെയാണ്. തകര്‍ന്നടിഞ്ഞ കാര്‍ഷിക മേഖലയെ കൈപിടിച്ച് ഉയര്‍ത്തുവാന്‍ മികച്ച വിപണനമേളയൊരുക്കുന്നതും തല്‍ക്കാലത്തേയ്ക്ക് ആശ്വാസമാണ്.
വൈപ്പിന്‍ മാലിപ്പുറം സ്വദേശി സ്വന്തം കടയിലെ ഗോഡൗണില്‍നിന്ന് വസ്ത്രങ്ങളെല്ലാം കൊടുത്ത് കട കാലിയാക്കി. ഇതുകണ്ട എല്ലാവരും അമ്പരന്നുപോയി. എല്ലാം ദൈവം തന്നതാണ്. എല്ലാം നഷ്ടപ്പെട്ടവര്‍ കൈനീട്ടുംമുമ്പേ മനസുതുറന്ന് കൊടുക്കുമ്പോള്‍ ആവശ്യമുള്ളത് ദൈവം തരും. വഴിയോര കച്ചവടക്കാരന്‍ പടച്ചതമ്പുരാന്റെ ദൂതനായി മാറി എറണാകുളം ബ്രോഡ്‌വേയില്‍ ഒരു കൊച്ചുമുറിയെടുത്തു. ആദ്യത്തെ കച്ചവടം ഒരു ലക്ഷം രൂപ. അതും നൗഷാദ് ഇക്ക ദുരിതാശ്വാസനിധിയിലേക്ക് അയച്ചുകൊടുത്തു. കടയുടെ പേര് നൗഷാദ് ഇക്കയുടെ കട.

admin

More articles by admin