പുതിയ പഠനകാലം തുടങ്ങുമ്പോള്‍

പുതിയ പഠനകാലം തുടങ്ങുമ്പോള്‍

റവ. ഡോ. ഗാസ്പര്‍ കടവിപ്പറമ്പില്‍

          പുത്തന്‍ അധ്യയന വര്‍ഷം തുടങ്ങി. അക്ഷരലോകത്തേക്കു വരുന്ന കുഞ്ഞുങ്ങള്‍ തുടങ്ങി ബിരുദ ബിരുദാനന്തര പഠനത്തിനായെത്തുന്നവര്‍ വരെ ശുഭപ്രതീക്ഷയോടെ പുതിയ പഠനകാലത്തെ സ്വാഗതം ചെയ്യുന്നു. ഉന്നത വിദ്യാഭ്യാസത്തിനായെത്തുന്നവര്‍ പലപ്പോഴും കൃത്യമായ ലക്ഷ്യബോധത്തോടെയാകണമെന്നില്ല പഠന വിഭാഗങ്ങള്‍ തിരഞ്ഞെടുക്കുന്നത്. സ്വന്തം താല്പര്യങ്ങളെയും അഭിരുചികളെയും മനസിലാക്കിയെത്തുന്നവരും ഉണ്ട്. ചില കാര്യങ്ങള്‍ ശ്രദ്ധിക്കേണ്ടതാണ്.
          പന്ത്രണ്ടാം ക്ലാസിനുശേഷം എന്ത് എന്നത് പലര്‍ക്കും കീറാമുട്ടിയായ ചോദ്യം തന്നെ. മാതാപിതാക്കളും സുഹൃത്തുക്കളും ബന്ധുക്കളുമെല്ലാം ഭാവിയെപ്പറ്റിയുള്ള ചോദ്യങ്ങളുമായി കുമാരി-കുമാരന്മാരെ ബുദ്ധിമുട്ടിക്കാന്‍ തുടങ്ങുന്ന ഈ സമയത്ത് എല്ലാവരുടെയും വായ അടപ്പിക്കുക എന്ന ഉദ്ദേശ്യത്തോടെ ഏതെങ്കിലുമൊരു കോഴ്‌സിനു ചേരുന്നവര്‍ നമ്മുടെ സമൂഹത്തില്‍ കൂടി വരുന്നു. അതു വ്യക്തിയുടെ താല്പര്യങ്ങളെ മാത്രമല്ല ഉന്നത വിദ്യാഭ്യാസരംഗത്തെയും ഗുണകരമായി സഹായിക്കില്ല. കൃത്യമായ ലക്ഷ്യബോധത്തോടെയല്ല ബിരുദക്ലാസുകളെത്തുന്നതെങ്കിലും അദ്ധ്യാപകരുമായും സഹപാഠികളുമായും ഇടപഴകിയും ക്ലാസുകളില്‍ സജീവമാകുന്ന പലര്‍ക്കും ഭാവിയെക്കുറിച്ചുള്ള പദ്ധതികള്‍ രൂപീകരിക്കുന്നതില്‍ വെളിച്ചം കിട്ടാറുണ്ട്.
          എന്തുതരം കോഴ്‌സുകളാണ് ഒരാള്‍ തന്റെ ഉന്നത വിദ്യാഭ്യാസത്തിനായി തിരഞ്ഞെടുക്കേണ്ടത് എന്നത് വളരെ പ്രധാനപ്പെട്ട ചോദ്യമാണ്. കുഞ്ഞുങ്ങളായിരിക്കുമ്പോള്‍ അവരോടു പലരും ഈചോദ്യം ചോദിച്ചിട്ടുണ്ടാകും: വലുതാകുമ്പോള്‍ നിനക്ക് ആരാകണമെന്നാണ് ആഗ്രഹം എന്ന ചോദ്യത്തിന്, പലതരം ഉത്തരങ്ങള്‍, അവരുടെ പ്രായത്തിന്റെ കൗതുകമനുസരിച്ച് പലരും പറഞ്ഞിട്ടുണ്ടാകും. പന്ത്രണ്ടാംക്ലാസ് കഴിഞ്ഞു നില്‍ക്കുന്ന ഒരാളോട് ഈ ചോദ്യം ചോദിക്കുമ്പോള്‍ കൃത്യമായ ഉത്തരം അയാള്‍ക്ക് ഉണ്ടാകണമെന്നില്ല. അതിലേക്ക് ഉത്തരങ്ങളിലേക്ക് എത്തിപ്പെടാന്‍ സമ്മര്‍ദങ്ങള്‍ക്ക് കീഴ്‌പ്പെടാതെ ഒരാള്‍ക്ക് കഴിയേണ്ടതാണ്. അയാള്‍ കണ്ടെത്തുന്ന അയാളുടെ ഭാവിയെക്കുറിച്ചുള്ള ഉത്തരങ്ങള്‍ യാഥാര്‍ത്ഥ്യബോധ്യത്തോടെയും വിമര്‍ശനാത്മകതയോടെയും പരിശോധിക്കാന്‍ പ്രാപ്തിയുള്ളവരുമായി സംസാരിക്കാന്‍ അവര്‍ക്ക് അവസരമുണ്ടാകണം.
             മാതാപിതാക്കള്‍ക്ക് തന്നെ എല്ലാ കാര്യങ്ങളും അറിയണമെന്നില്ലല്ലോ. കുടുംബയൂണിറ്റുകളെന്നോ ബിസിസികളെന്നോ വിളിക്കപ്പെടുന്ന അടിസ്ഥാന സമൂഹത്തിലെ വിദ്യാഭ്യാസസമിതികളുടെ ചുമതലയാണിതെന്നു തോന്നുന്നു. മാര്‍ക്കു കൂടുതല്‍ വാങ്ങിയവരെ സമ്മാനം കൊടുത്ത് ആദരിക്കാന്‍ മാത്രമല്ലല്ലോ ഈ സമിതിയുടെ ചുമതല. മാര്‍ക്കുള്ളവരെയും കുറഞ്ഞവരെയും ഒരുപോലെ ലക്ഷ്യബോധം നല്‍കി നയിക്കാന്‍ പ്രാപ്തിയുള്ളവര്‍കൂടിയാകണം ഇത്തരം സമിതികളില്‍ പ്രവര്‍ത്തിക്കുന്നവര്‍. ഇടവകയിലെ വൈദികര്‍ക്കും സന്യസ്തര്‍ക്കും കൂടി ഈ കാര്യങ്ങളില്‍ നിര്‍ണായകമായ പങ്ക് വഹിക്കാനുണ്ടാകും. ഇടവകകളില്‍ പ്രവര്‍ത്തിക്കുന്ന യുവജനസംഘടനയുടെ സഹകരണത്തോടെ ഓറിയന്റേഷന്‍ പ്രോഗ്രാമുകള്‍ അടിസ്ഥാന സമൂഹങ്ങളുടെ ചെറിയ ചെറിയ ഗ്രൂപ്പുകളായി സംഘടിപ്പിക്കാനാകും. ചെറിയ സമൂഹങ്ങളില്‍ യുവാക്കളുടെ പങ്കാളിത്തവും ശ്രദ്ധയോടെയുള്ള പങ്കുചേരലും സാധ്യമാകും.
              വലിയ ഇടവകകളില്‍ ഇത്തരം പ്രോഗ്രാമുകള്‍ ഇടവകതലത്തില്‍ സംഘടിപ്പിക്കപ്പെടാറുണ്ടെങ്കിലും അത്രക്ക് വിജയകരമാകുന്നത് കണ്ടിട്ടില്ല. യുവജനങ്ങള്‍ മനസു തുറക്കുന്നത് ചെറിയ സമൂഹങ്ങളിലാകാനാണ് സാധ്യത കൂടുതല്‍. സാമ്പത്തികമായും സംഘടനത്തിനും ക്ലേശമുണ്ടാകുമെങ്കിലും ചെറിയ സമൂഹങ്ങളിലെ ചര്‍ച്ചകള്‍ തന്നെയാകും ഫലപ്രദമാകുന്നത്.
             ബിരുദവിഷയങ്ങള്‍ തിരഞ്ഞെടുക്കുമ്പോള്‍, വിദ്യാര്‍ത്ഥിനി-വിദ്യാര്‍ത്ഥിയുടെ പഠനാഭിരുചി മനസിലാക്കി മുന്‍ഗണന നിശ്ചയിക്കേണ്ടതാണ്. തൊഴില്‍ സാധ്യതകള്‍ അന്വേഷിച്ച് അതിനുതകുന്ന കോഴ്‌സുകള്‍ തിരഞ്ഞെടുക്കുന്നതുപോലെ തന്നെ പ്രധാനപ്പെട്ടതാണ് പഠനാഭിരുചി മനസിലാക്കി ബിരുദ പഠനത്തിനിറങ്ങുന്നതും. കലാപഠനത്തിന് താല്പര്യമുള്ള ഒരാള്‍ അത് തിരഞ്ഞെടുക്കട്ടെ. മാനസിക-സാമൂഹ്യ വിഷയങ്ങളില്‍ പഠനത്തിന് താല്പര്യമുള്ളവര്‍ അതിലേക്കു നീങ്ങണം. ശാസ്ത്ര വിഷയങ്ങളോട് അഭിരുചിയുള്ളവര്‍ അതില്‍ ശ്രദ്ധ പുലര്‍ത്തണം.
              മെഡിക്കല്‍ ബിരുദവും എഞ്ചിനീയറിംഗ് ബിരുദവും മാത്രമല്ല തുറന്നുകിട്ടുന്ന സാധ്യതകളെന്ന് കേരളത്തിലെ യുവാക്കളെ ബോധ്യപ്പെടുത്താന്‍ സാധിക്കേണ്ടതാണ്. നിയമപഠനവും മാധ്യമപഠനവും ആര്‍ക്കിടെക്ചര്‍ പഠനവും അടക്കം വ്യത്യസ്ത മേഖലകളും സാധ്യതകളും ഇന്ന് ലഭ്യമാണ്. വിവിധ വിഷയങ്ങളില്‍ ബിരുദപഠനം നടത്താന്‍ അവസരമൊരുക്കുന്ന കലാലയങ്ങള്‍, ബിരുദ പഠനത്തിനുശേഷം സാധ്യമാകുന്ന ഉന്നത പഠനമേഖലകള്‍ ലഭ്യമാക്കുന്ന സ്‌കോളര്‍ഷിപ്പുകള്‍, ഗവണ്‍മെന്റ് നല്‍കുന്ന അന്താരാഷ്ട്രമേഖലകളിലെ പഠനസാധ്യതകള്‍ തുടങ്ങിയ കാര്യങ്ങള്‍ ആധുനിക ഇന്റര്‍നെറ്റ് സൗകര്യങ്ങള്‍ പ്രയോജനപ്പെടുത്തി മനസിലാക്കിയെടുക്കാന്‍ യുവജനങ്ങള്‍ തയ്യാറാകണം. അതിനുള്ള അവസരങ്ങള്‍ ലഭിക്കാത്തവരെ സഹായിക്കാന്‍ ഇടവക കേന്ദ്രീകരിച്ചുള്ള സംഘനകള്‍ മുന്നിട്ടിറങ്ങുക തന്നെ വേണം. നിസ്വാര്‍ത്ഥമായ ശുശ്രൂഷ തന്നെയാണല്ലോ ആത്മീയത!
               അദ്ധ്യാപക മേഖലകളില്‍ താല്പര്യമുള്ളവരെ അതിനൊരുക്കമായുള്ള ‘നെറ്റ്’ പരീക്ഷയെഴുതാന്‍ തയ്യാറെടുപ്പിക്കുകയും, ഗവേഷണാഭിമുഖ്യമുള്ളവര്‍, അതേ ‘നെറ്റ്’ പരീക്ഷ തന്നെ കൂറെക്കൂടി ശ്രദ്ധയോടെ എഴുതി ഫെലോഷിപ്പുകള്‍ക്ക് അര്‍ഹമായി പഠനകാര്യങ്ങള്‍ മുന്നോട്ടുകൊണ്ടുപോകുന്നതും നല്ലതാണ്. ഗവണ്‍മെന്റ് നല്‍കുന്ന വിവിധ മന്ത്രാലയങ്ങള്‍ നല്‍കുന്ന പ്രത്യേകിച്ച് പെണ്‍കുട്ടികള്‍ക്കായുള്ള സ്‌കോളര്‍ഷിപ്പുകളെപ്പറ്റി നമ്മുടെ യുവജനങ്ങള്‍ മനസിലാക്കിയെടുക്കണം. ഇന്ത്യന്‍ ഇന്‍സ്റ്റിറ്റിയൂട്ട് ഓഫ് ടെക്‌നോളജി. എന്ന ഐഐടികളില്‍ ഹ്യൂമാനിറ്റീസ് വിഷയങ്ങള്‍ക്കടക്കം ഗവേഷണ സാധ്യതകളുണ്ടെന്നും, അവിടെ പഠിക്കാന്‍ അവസരം നേടിയെടുക്കാന്‍ ശ്രമിക്കേണ്ടതാണെന്നും പറയുമ്പോഴാണ് പല കുട്ടികളും ഐഐടികളെക്കുറിച്ചു കേള്‍ക്കുന്നതു തന്നെ. ശാസ്ത്രാഭിരുചിയുള്ളവര്‍, ബിരുദാനന്തര പഠനശേഷം ഗവേഷകരാകാന്‍ താല്പര്യപ്പെടുകയാണെങ്കില്‍, അടിസ്ഥാന ശാസ്ത്രവിഷയങ്ങളില്‍ ഗവേഷണ സൗകര്യമൊരുക്കുന്ന ഉന്നത വിദ്യാഭ്യാസ കേന്ദ്രങ്ങള്‍ ഇന്ത്യയിലെമ്പാടും ഉണ്ടെന്നറിയുന്നതും നല്ലതാണ്. ഗവേഷണപ്രബന്ധം തീര്‍ത്തുകഴിഞ്ഞാല്‍ ഗവേഷണം തീര്‍ന്നു എന്ന പഴഞ്ചന്‍ ചിന്താഗതിയൊക്കെ മാറിയ കാര്യം ഇന്ന് ഗവേഷണമേഖലയിലുള്ളവര്‍ക്ക് അറിയാവുന്നതാണ്. കൂടുതല്‍ കൂടുതല്‍ ഗവേഷണ മേഖലകള്‍ തുറന്നുവരുന്ന കാലഘട്ടമാണ് നമ്മുടേത്. അത് ശാസ്ത്രമേഖലയുടെ മാത്രം പ്രതിഭാസമല്ല; സാമൂഹ്യ-മാനസിക വിഷയങ്ങളുടെയും കൂടി കാര്യമാണ്.
               സിവില്‍ സര്‍വീസ് മേഖലകളിലേക്ക് തിരിയാന്‍ താല്പര്യമുള്ളവര്‍ അതിനനുസരിച്ചുള്ള ഭാഷാ നൈപുണ്യവും വായനാശീലവും ചിന്താപദ്ധതികളും ആര്‍ജിക്കണം. നല്ല ലൈബ്രറികള്‍ കണ്ടെത്തി പ്രയോജനപ്പെടുത്തണം. ഇതുമായി ബന്ധപ്പെട്ട കാര്യങ്ങളെക്കുറിച്ച് ധാരണയുള്ളവരുമായി സംസാരിച്ച് വ്യക്തത നേടണം. അടുക്കും ചിട്ടയോടും കൂടിയ പഠനത്തിന് തുടക്കം കുറിക്കണം. സര്‍ക്കാര്‍ മേഖലയില്‍ ജോലി നേടാന്‍ പരിശ്രമിക്കുന്നവരും ഈ രീതിയിലുള്ള പഠനശ്രമം നടത്തേണ്ടതാണ്. താല്പര്യമുള്ള ജനങ്ങള്‍ക്ക് ഒരുമിച്ചുകൂടി പഠനപ്രവര്‍ത്തനങ്ങളും ഒരുക്കവും നടത്താനുള്ള സ്ഥല സൗകര്യമുണ്ടെങ്കില്‍ ഇടവക കേന്ദ്രീകരിച്ച് അത് നല്കുന്നത് ഉചിതമായിരിക്കും. ഏത് നേട്ടവും നിരന്തരമായ അന്വേഷണത്തിലൂടെയും കഠിനമായ പരിശ്രമത്തിലൂടെയും മാത്രമേ ആര്‍ജിക്കാനാവൂ. അവസരങ്ങള്‍ തേടിവരുന്നതല്ല; അന്വേഷിച്ച് കണ്ടെത്തുന്നതാണ്. ജീവിത മത്സരം കൊടുമ്പിരികൊള്ളുന്ന കാലത്ത് ഉത്സാഹഭരിതമായി അതിലിടപെടാന്‍ യുവാക്കളെ പരിശീലിപ്പിക്കല്‍ കൂടിയാണ് ഉന്നത വിദ്യാഭ്യാസത്തിന്റെ ലക്ഷ്യങ്ങളിലൊന്ന.് സമൂഹങ്ങള്‍ വളരുന്നത് ലക്ഷ്യബോധമുള്ള ചെറുപ്പക്കാരെ രൂപീകരിച്ചെടുക്കുമ്പോഴാണ്. അവരവരുടെ കംഫര്‍ട്ട് സോണുകള്‍ വിട്ട് സമൂഹത്തിന്റെ പുരോഗതിക്കുവേണ്ടി പ്രയ്ത്‌നിക്കുമ്പോഴാണ് ഏതു സമുദായത്തിന്റെയും നേതൃനിരയിലുള്ളവര്‍ അവരവരുടെ ധര്‍മം നിറവേറ്റുന്നവരാവുകയുള്ളൂ. വാതിലുകള്‍ കൊട്ടിയടക്കുന്നവരെയല്ല അവസരങ്ങളുടെ വാതായനങ്ങള്‍ വലിച്ചുതുറക്കുന്നവരെയാണ് കാലഘട്ടത്തിനാവശ്യം. അറിയാനും അറിയിക്കാനും വേണ്ടി പള്ളിക്കൂടങ്ങള്‍ തുറന്നവരുടെ പിന്‍ഗാമികള്‍ അവസരങ്ങള്‍ നഷ്ടപ്പെടുത്തരുത്.


Related Articles

രാജാവ്‌ നഗ്നനാണ്‌!

“രാജ്യത്തിന്റെയും ജുഡീഷ്യറിയുടെയും ചരിത്രത്തിലെ അസാധാരണമായ സംഭവമാണിത്‌. സുപ്രീംകോടതിയുടെ നടത്തിപ്പു ശരിയായ രീതിയിലല്ല. കഴിഞ്ഞ ഏതാനും മാസങ്ങളായി അനഭിലഷണീയമായ രീതിയിലാണ്‌ പല കാര്യങ്ങളും സംഭവിച്ചിട്ടുള്ളത്‌. ഈ സ്ഥാപനം സംരക്ഷിക്കപ്പെട്ടില്ലെങ്കില്‍

ഇന്ത്യയും കൊറോണയുടെ ഇരുപതിനായിരം ക്ലബ്ബില്‍

*ലോകത്ത് കൊറോണ രോഗികള്‍ 2,558,951, മരണം 177,704 ന്യൂഡല്‍ഹി: ഇരുപതിനായിരം കൊവിഡ്-19 രോഗികളുള്ള രാജ്യങ്ങളുടെ പട്ടികയില്‍ ഇന്ത്യയും സ്ഥാനംപിടിച്ചു. 20,225 രോഗികളാണ് ഇപ്പോള്‍ ഇന്ത്യയിലുള്ളത്. 655 പേരാണ്

ജിയോ ട്യൂബ് കടല്‍ഭിത്തി: നടപടി ആവശ്യപ്പെട്ട് ധര്‍ണ നടത്തി തൃശൂര്‍: ചെല്ലാനത്ത് ജിയോ ട്യൂബ് കടല്‍ ഭിത്തി നിര്‍മാണം അടിയന്തരമായി പൂര്‍ത്തിയാക്കണമെന്നാവശ്യപ്പെട്ട് ചെല്ലാനം നിവാസികള്‍ തൃശൂര്‍ സെന്‍ട്രല്‍ സര്‍ക്കിളില്‍ സ്ഥിതി ചെയ്യുന്ന എറണാകുളം ജലസേചന വകുപ്പ് സുപ്രണ്ടിംഗ് എന്‍ജിനീയറുടെ കാര്യാലയത്തിനു മുന്നില്‍ ധര്‍ണ നടത്തി. 2018 ജൂലൈയില്‍ 8 കോടി രൂപയ്ക്ക് കരാര്‍ നല്‍കിയെങ്കിലും ഇതുവരെ ജോലികള്‍ ആരംഭിക്കാന്‍ കരാറുകാരന് കഴിഞ്ഞിട്ടില്ല. കരാര്‍വ്യവസ്ഥകള്‍ പ്രകാരം പുറംകടലില്‍ നിന്ന് ഡ്രെഡ്ജര്‍ ഉപയോഗിച്ച് അഞ്ചു മീറ്റര്‍ വ്യാസവും 25 മീറ്റര്‍ നീളവുമുള്ള ജിയോ ട്യൂബുകള്‍ നിറയ്ക്കാന്‍ വെറും ആറു മണിക്കൂര്‍ മതിയെന്നിരിക്കെ കരാര്‍ അധികാരിയായ സൂപ്രണ്ടിംഗ് എന്‍ജിനിയറുടെയും ഉദ്യോഗസ്ഥരുടെയും അനാസ്ഥയാണ് പണികള്‍ നീണ്ടുപോകാന്‍ കാരണമെന്ന് സമരക്കാര്‍ ആരോപിച്ചു. ഓഖി ദുരന്തത്തില്‍ രണ്ടു മരണങ്ങള്‍ സംഭവിച്ച ഈ പ്രദേശത്ത് മഴക്കാലമാകുന്നതോടുകൂടി ശക്തമായ കടലാക്രമണം പതിവാണ്. കടല്‍ഭിത്തിയുടെ നിര്‍മാണം പൂര്‍ത്തിയായില്ലെങ്കില്‍ മഴക്കാലത്ത് തീരദേശവാസികളുടെ ജീവനും സ്വത്തിനും ഭീമമായ നാശനഷ്ടങ്ങള്‍ ഉണ്ടാകും. ഗവണ്‍മെന്റ് പണമനുവദിച്ചിട്ടും പണികള്‍ പൂര്‍ത്തിയാക്കാന്‍ കഴിയാത്ത സൂപ്രണ്ടിംഗ് എന്‍ജിനീയര്‍ക്കും ഉദ്യോഗസ്ഥര്‍ക്കുമെതിരെ നടപടിയെടുക്കണമെന്ന് പശ്ചിമകൊച്ചി തീരസംരക്ഷണ സമിതി ആവശ്യപ്പെട്ടു. തൃശൂര്‍ മ്യൂസിയത്തിനു സമീപത്തുനിന്നാരംഭിച്ച പ്രകടനം ഫാ. ജോണ്‍ കണ്ടത്തിപ്പറമ്പില്‍ ഉദ്ഘാടനം ചെയ്തു. കേരള ലാറ്റിന്‍ കാത്തലിക് അസോസിയേഷന്‍ കൊച്ചി രൂപത മുന്‍ ഡയറക്ടര്‍ ഫാ. സെബാസ്റ്റ്യന്‍ പുത്തംപുരയ്ക്കല്‍ ഉദ്ഘാടനം ചെയ്തു. ഫാ. ഫ്രാന്‍സീസ് പൂപ്പാടി അധ്യക്ഷത വഹിച്ചു. പശ്ചിമകൊച്ചി തീരസംരക്ഷണ സമിതി കണ്‍വീനര്‍ ടി.എ ഡാല്‍ഫില്‍ സമരപ്രഖ്യാപനം നടത്തി. കെഎല്‍സിഎ കൊച്ചി രൂപത ജനറല്‍ സെക്രട്ടറി ബാബു കാളിപ്പറമ്പില്‍, വിന്‍ സൊസൈറ്റി കോ-ഓര്‍ഡിനേറ്റര്‍ ആനി ജോസഫ്, എം.എന്‍ രവികുമാര്‍, ജിന്‍സന്‍ വെളുത്തമണ്ണുങ്കല്‍, ആല്‍ഫ്രഡ് ബെന്നോ, നോബി അരിവീട്ടില്‍, ആന്റോജി കളത്തുങ്കല്‍ എന്നിവര്‍ പ്രസംഗിച്ചു. തുടര്‍ന്ന് സൂപ്രണ്ടിംഗ് എന്‍ജിനീയര്‍ എല്‍.എസ് സലിമുമായി നടന്ന ചര്‍ച്ചയില്‍ ഡ്രെഡ്ജര്‍ ഉപയോഗിച്ച് രണ്ടു ദിവസത്തിനകം പണികള്‍ ആരംഭിക്കാന്‍ രേഖാമൂലം കരാറുകാരനോട് ആവശ്യപ്പെട്ടിട്ടുണ്ടെന്നും കരാറുകാരന്‍ നിര്‍ദേശങ്ങള്‍ അനുസരിക്കാത്തപ ക്ഷം കരിംപട്ടികയില്‍ ഉള്‍പ്പെടുത്തുന്നത് ഉള്‍പ്പെടെയുള്ള നടപടികള്‍ സ്വീകരിക്കുമെന്നും സമര സമിതിയെ അറിയിച്ചു.

തൃശൂര്‍: ചെല്ലാനത്ത് ജിയോ ട്യൂബ് കടല്‍ ഭിത്തി നിര്‍മാണം അടിയന്തരമായി പൂര്‍ത്തിയാക്കണമെന്നാവശ്യപ്പെട്ട് ചെല്ലാനം നിവാസികള്‍ തൃശൂര്‍ സെന്‍ട്രല്‍ സര്‍ക്കിളില്‍ സ്ഥിതി ചെയ്യുന്ന എറണാകുളം ജലസേചന വകുപ്പ് സുപ്രണ്ടിംഗ്

No comments

Write a comment
No Comments Yet! You can be first to comment this post!

Write a Comment

Your e-mail address will not be published.
Required fields are marked*