പ്രവാചകദൗത്യത്തോടെ മുന്നേറട്ടെ

പ്രവാചകദൗത്യത്തോടെ മുന്നേറട്ടെ

1980കളിലാണ് നിയുക്ത ബിഷപ് ജയിംസ് ആനാപറമ്പിലിനെ പരിചയപ്പെടുന്നത്. സെമിനാരി പഠനത്തിനിടയിലായിരുന്നു ഈ ആദ്യകൂടിക്കാഴ്ച. അദ്ദേഹം എന്റെ ഒരു വര്‍ഷം ജൂനിയറായിരുന്നു. പിന്നീട് 90കളില്‍ ഞാന്‍ റോമില്‍ പഠിക്കാനായി പോയി. ഒന്നോ രണ്ടോ വര്‍ഷത്തിനു ശേഷം ജയിംസച്ചനും പഠിക്കാനായി റോമിലെത്തി. രണ്ടു യൂണിവേഴ്‌സിറ്റികളിലായിരുന്നു പഠനമെങ്കിലും ഞങ്ങള്‍ തമ്മിലുള്ള സൗഹൃദം പുതുക്കാനും കൂടുതല്‍ അടുത്തിടപഴകാനും അവസരമുണ്ടായി.

റോമില്‍ നിന്നും തിരിച്ചുവന്നശേഷം ഞങ്ങളിരുവരും സെമിനാരി സേവനത്തിലായിരുന്നു. ആലുവ സെന്റ് ജോസഫ്‌സ് പൊന്തിഫിക്കല്‍ സെമിനാരിയിലും ഞങ്ങള്‍ സഹപ്രവര്‍ത്തകരായിരുന്നു. 1998 മുതല്‍ 2009 വരെയും 2011 മുതല്‍ 2014 വരെയും സെന്റ് ജോസഫ്‌സ് പൊന്തിഫിക്കല്‍ സെമിനാരിയില്‍ ബിബ്ലിക്കല്‍ തിയോളജി, ഹെബ്രായ ഭാഷ എന്നീ വിഷയങ്ങളുടെ അദ്ധ്യാപകനായി ജയിംസച്ചന്‍ സേവനം അനുഷ്ഠിച്ചിട്ടുണ്ട്. പൊന്തിഫിക്കല്‍ ഇന്‍സ്റ്റിറ്റിയൂട്ടിന്റെ പ്രസിഡന്റ് പദവിയും അലങ്കരിച്ചു. ഞാനന്ന് സെമിനാരിയില്‍ ഫോര്‍മാറ്ററായിരുന്നു. 2009-11 കാലയളവില്‍ ജയിംസച്ചന്‍ കാര്‍മല്‍ഗിരി സെമിനാരി റെക്ടറായി. അവിടെ അദ്ദേഹത്തിനു ശേഷം ഞാനാണ് ഈ പദവിയിലെത്തിയത്. വളരെ ഊഷ്മളവും സ്‌നേഹോദാരവുമായിരുന്നു ഒരുമിച്ചുണ്ടായിരുന്ന ആ വര്‍ഷങ്ങള്‍. പരിചയസമ്പന്നനും ശക്തനുമായ സഹപ്രവര്‍ത്തകനായിരുന്നു ജയിംസച്ചന്‍.

യഹൂദമതം, ഹെബ്രായ ഭാഷ, പഴയനിയമം ഇതു മൂന്നും അദ്ദേഹത്തിന്റെ തീവ്രവികാരമായിരുന്നു. അദ്ദേഹത്തിന്റെ ഉന്നതപഠനങ്ങളെല്ലാം ഈ വിഷയങ്ങളെ കേന്ദ്രീകരിച്ചായിരുന്നു. വേരുകളന്വേഷിച്ചുള്ള ഒരു യാത്രയായിരുന്നു അതെന്ന് തോന്നിയിട്ടുണ്ട്. കാരണം ക്രൈസ്തവീകതയുടെ വേരുകള്‍ യഹൂദമതത്തിലും, യഹൂദ ആരാധനയിലും(ഹെബ്രായ ഭാഷ) പഴയ നിയമത്തിലുമാണ് കണ്ടെത്തേണ്ടിയിരുന്നത്.

ഹെബ്രായ ഭാഷയിലുള്ള വൈദഗ്ദ്ധ്യം പിന്നീട് പഴയനിയമം പരിഷ്‌കരിക്കുന്ന കെസിബിസി ബൈബിള്‍ കമ്മീഷന്‍ വിദഗ്ദ്ധ സമിതിയില്‍ അംഗമായി പ്രവര്‍ത്തിച്ചപ്പോള്‍ ജയിംസച്ചന് നന്നായി പ്രയോജനപ്പെട്ടിട്ടുണ്ടാകും; അതുവഴി സഭയ്ക്കും.

ആരാധനക്രമത്തിലൂന്നിയ അദ്ദേഹത്തിന്റെ ആദ്ധ്യാത്മികത മറ്റുള്ളവര്‍ക്ക് മാതൃകയാണ്. യാമപ്രാര്‍ത്ഥനകളുടെ പഠനത്തില്‍ പ്രത്യേക ശ്രദ്ധ അദ്ദേഹം പതിപ്പിച്ചു. ഇടയന്മാരുടെ ആദ്ധ്യാത്മികത അവര്‍ ആവര്‍ത്തിച്ചുചൊല്ലുന്ന പ്രാര്‍ത്ഥനയുടെ അടിസ്ഥാനത്തിലായിരിക്കുമെന്ന് വിശ്വസിക്കുന്നയാളാണ് ഞാന്‍. അതാണ് അവരുടെ ആദ്ധ്യാത്മികതയെ രൂപപ്പെടുത്തേണ്ടത്. അതു വളരെ വ്യക്തമായറിയാവുന്നയാളാണ് ജയിംസച്ചന്‍. യാമപ്രാര്‍ത്ഥനകളിലെ സങ്കീര്‍ത്തനങ്ങള്‍ അദ്ദേഹം ആഴത്തില്‍ പഠിച്ചു.

ഒരു കാലത്ത് വളരെ പ്രചാരത്തിലുണ്ടായിരുന്ന ലെക്‌സിയോ ദിവീന എന്ന ദൈവവചനത്തില്‍ അധിഷ്ഠിതമായ ധ്യാനരീതിയെ ശക്തമായി പ്രോത്സാഹിപ്പിച്ചു. ബൈബിള്‍ പഠനത്തിന് അതേറെ അദ്ദേഹത്തെ സഹായിച്ചിട്ടുണ്ടെന്ന് തീര്‍ച്ചയാണ്.

ആലപ്പുഴ രൂപതയിലെ ദൈവജനത്തെ പ്രത്യാശയുടെ പാതയിലൂടെ നയിക്കുവാനുള്ള കരുത്തും ദൈവാനുഗ്രഹവും ഈ പുതിയ ഇടയന് ഉണ്ടാകട്ടെ എന്ന പ്രാര്‍ത്ഥിക്കുന്നു.

 

റവ. ഡോ. ജേക്കബ് പ്രസാദ്
(റെക്ടര്‍, സെന്റ് ജോസഫ്‌സ് പൊന്തിഫിക്കല്‍ സെമിനാരി, കാര്‍മല്‍ഗിരി, ആലുവ)


Related Articles

ബുര്‍കിന ഫാസോയെ മാതാവിന്റെ നിര്‍മല ഹൃദയത്തിനു പ്രതിഷ്ഠിച്ചു

ഔഗദൗഗോ: ഇസ്‌ലാമിക തീവ്രവാദ ആക്രമണങ്ങളില്‍ ആയിരക്കണക്കിന് ക്രൈസ്തവര്‍ കൊല്ലപ്പെട്ട പടിഞ്ഞാറന്‍ ആഫ്രിക്കയിലെ സഹേല്‍ മേഖലയിലെ ബുര്‍കിന ഫാസോ, നിഷെര്‍ രാജ്യങ്ങളിലെ 17 കത്തോലിക്കാ രൂപതകളില്‍ നിന്നുള്ള വിശ്വാസികള്‍

ക്രിസ്തുവിന്റെ ഇടപെടലുകള്‍ യുവത്വത്തിന്റെ മാതൃക-ചിന്താ ജെറോം

കൊല്ലം: യുവാവായ ക്രിസ്തു നടത്തിയ ഇടപെടലുകള്‍ യുവത്വം എങ്ങനെയായിരിക്കണമെന്നതിന്റെ മാതൃകയാണെന്ന് സംസ്ഥാന യുവജന കമ്മീഷന്‍ ചെയര്‍പേഴ്‌സണ്‍ ചിന്താ ജെറോം പറഞ്ഞു. കെആര്‍എല്‍സിസി സമുദായ ദിനത്തോടനുബന്ധിച്ച് ഫാത്തിമ മാതാ

തോറ്റവരെയും അന്വേഷിക്കണം

വിദ്യാര്‍ഥികള്‍ക്ക് പരീക്ഷയാകുന്ന പരീക്ഷണ കാലഘട്ടം തല്ക്കാലം കഴിഞ്ഞു. ഫലപ്രഖ്യാപനങ്ങള്‍ വന്നു കഴിഞ്ഞു. കേരളാ സിലബസ് ഐസിഎസ്ഇ, സിബിഎസ്ഇ, എസ്എസ്‌സി, പ്ലസ് ടു ഫലങ്ങള്‍ വന്നുകഴിഞ്ഞു. ഉത്തന്നതവിജയം കൈവരിച്ച

No comments

Write a comment
No Comments Yet! You can be first to comment this post!

Write a Comment

Your e-mail address will not be published.
Required fields are marked*