Breaking News

മതങ്ങളുടെ ചൈനാവത്കരണത്തില്‍ വിട്ടുവീഴ്ചയില്ലെന്ന് ലീ കെക്വിയാങ്

മതങ്ങളുടെ ചൈനാവത്കരണത്തില്‍ വിട്ടുവീഴ്ചയില്ലെന്ന് ലീ കെക്വിയാങ്

ബെയ്ജിങ്: ചൈനയില്‍ എല്ലാ മതവിഭാഗങ്ങളെയും കമ്യൂണിസ്റ്റ് പാര്‍ട്ടിയുടെ പൂര്‍ണ നിയന്ത്രണത്തില്‍ കൊണ്ടുവരാനുള്ള സാംസ്‌കാരിക അനുരൂപണ നീക്കം കൂടുതല്‍ ശക്തമാക്കുമെന്ന് പ്രധാനമന്ത്രി ലീ കെക്വിയാങ് ദേശീയ പാര്‍ലമെന്റിന്റെ സമ്പൂര്‍ണ സമ്മേളനത്തില്‍ വ്യക്തമാക്കി. മതങ്ങളുടെ കാര്യത്തില്‍ പാര്‍ട്ടി നിശ്ചയിച്ചിട്ടുള്ള ചൈനാവത്കരണത്തിന്റെ മൗലിക നയം കര്‍ശനമായി നടപ്പാക്കുമെന്ന് ഗ്രെയ്റ്റ് ഹാള്‍ ഓഫ് ദ് പീപ്പിളില്‍ ആരംഭിച്ച പത്തുദിവസത്തെ നാഷണല്‍ പീപ്പിള്‍സ് കോണ്‍ഗ്രസില്‍ വാര്‍ഷിക കര്‍മ പരിപാടി അവതരിപ്പിച്ചുകൊണ്ട് കമ്യൂണിസ്റ്റ് സമഗ്രാധിപത്യ ഭരണകൂടത്തില്‍ രണ്ടാം സ്ഥാനക്കാരനായ പ്രധാനമന്ത്രി പറഞ്ഞു.
മെത്രാന്മാരുടെ നിയമനം സംബന്ധിച്ച് വത്തിക്കാനും ചൈനയും തമ്മില്‍ കഴിഞ്ഞ സെപ്റ്റംബറില്‍ ഒപ്പുവച്ച രഹസ്യ ഉടമ്പടി ചൈനയില്‍ കത്തോലിക്കാസഭയുടെ ഐക്യത്തിനും വളര്‍ച്ചയ്ക്കും വഴിതെളിക്കുമെന്ന് ചൈനീസ് ഗവണ്‍മെന്റിന്റെ രാഷ്ട്രീയ ഉപദേശക സമിതി വിലയിരുത്തിയതായി കമ്യൂണിസ്റ്റ് പാര്‍ട്ടിയുടെയും ഭരണകൂടത്തിന്റെയും നിയന്ത്രണത്തിലുള്ള ചൈനീസ് കാത്തലിക് പേട്രിയോട്ടിക് അസോസിയേഷന്‍ വൈസ് പ്രസിഡന്റും ദേശീയ ജനകീയ കോണ്‍ഗ്രസ് അംഗവുമായ ബിഷപ് വിന്‍സന്റ് ഷാന്‍ സിലു പറഞ്ഞു.
ചൈനീസ് പ്രസിഡന്റ് ഷീ ജിന്‍പിങ് 2015ല്‍ അവതരിപ്പിച്ച മതങ്ങളുടെ സമ്പൂര്‍ണ ചൈനാവത്കരണ നയം 2017ല്‍ ചൈന ഭരണഘടനയുടെ ഭാഗമാക്കിയതാണ്. ഇതിന്റെ ഭാഗമായി കത്തോലിക്കാ, പ്രൊട്ടസ്റ്റന്റ്, മുസ്‌ലിം മതവിഭാഗങ്ങളുടെ പ്രവര്‍ത്തനങ്ങള്‍ നിയന്ത്രിക്കുന്ന സര്‍ക്കാര്‍ സംഘടനകള്‍ ചൈനാവത്കരണത്തിനായുള്ള വിശദമായ പഞ്ചവത്സര പദ്ധതികള്‍ പ്രഖ്യാപിക്കുകയുണ്ടായി. വിശദമായ വ്യാഖ്യാനങ്ങളോടെ ബൈബിളിന്റെ പുനരാഖ്യാനം നിര്‍വഹിക്കാനും, തിരുക്കര്‍മങ്ങളിലും ആരാധനക്രമത്തിലും പ്രാര്‍ഥനാശുശ്രൂഷകളിലും സംഗീതത്തിലും ദേവാലയങ്ങളുടെ രൂപകല്പനയിലും സഭാശുശ്രൂഷകരുടെ വസ്ത്രധാരണത്തിലും മറ്റും ചൈനീസ് സംസ്‌കാരത്തിന്റെ മൂല്യങ്ങളും പ്രതിരൂപങ്ങളും സമൃദ്ധമായി ഉള്‍ച്ചേര്‍ക്കാനും നിര്‍ദേശമുണ്ട്.
ചൈനയുമായുണ്ടാക്കിയ താത്കാലിക കരാര്‍ കാലക്രമത്തില്‍ ഏറെ പരിഷ്‌കരിക്കാനുണ്ടെന്ന് ഈ ദിവസങ്ങളില്‍ ഹോങ്കോങ്, മക്കാവോ, തയ്‌വാന്‍ എന്നിവിടങ്ങള്‍ സന്ദര്‍ശിച്ച സുവിശേഷവത്കരണത്തിനായുള്ള വത്തിക്കാന്‍ കാര്യാലയത്തിന്റെ അധ്യക്ഷന്‍ കര്‍ദിനാള്‍ ഫെര്‍നാന്‍ഡോ ഫിലോനി പറഞ്ഞു. പരിശുദ്ധ സിംഹാസനത്തോടു കൂറുള്ള ചൈനയിലെ പീഡിത സഭാവിഭാത്തിലെ 30 മെത്രാന്മാരില്‍ ഒരാളെ മാത്രമാണ് ഈ ഉടമ്പടിക്കുശേഷം ചൈനീസ് ഭരണകൂടം ഔദ്യോഗികമായി അംഗീകരിച്ചിട്ടുള്ളത്. അതേസമയം വത്തിക്കാന്റെ അനുമതിയില്ലാതെ മെത്രാഭിഷേകം നടത്തിയതിന് സഭാവിലക്കു പ്രഖ്യാപിച്ചിരുന്ന സര്‍ക്കാര്‍ പക്ഷക്കാരായ മെത്രാന്മാരെ പുതിയ ഉടമ്പടി അനുസരിച്ച് റോമിലെ പരിശുദ്ധ സിംഹാസനം സാര്‍വത്രിക സഭാശുശ്രൂഷയില്‍ പങ്കുകാരാക്കിയിരുന്നു.
ചൈനാവത്കരണത്തിന്റെ ഭാഗമായി ഷിന്‍ജിയാങ്ങിലെ 20 ലക്ഷം ഉയ്ഗൂര്‍ മുസ്‌ലിംകളെ ചൈനീസ് ഭരണകൂടം സാംസ്‌കാരിക പുനര്‍വിദ്യാഭ്യാസത്തിനായുള്ള തടങ്കല്‍പാളയത്തില്‍ അടച്ചിരിക്കയാണ്.


Tags assigned to this article:
chinachristianity

Related Articles

ഇന്ന് വിഭൂതി ബുധന്‍.. ഒരു തിരിഞ്ഞുനോട്ടം

ഒരു തിരിഞ്ഞുനോട്ടം, ഒരു തിരിച്ചറിവ്, ഒരു തിരിച്ചുവരവ് തപസുകാലത്തിന്റെ അന്തസത്ത ഏറെക്കുറെ ഇങ്ങനെയാണെന്നു തോന്നുന്നു. പൂര്‍ണഹൃദയത്തോടുകൂടിയുള്ള ഒരു തിരിച്ചുവരവ്. ആ തിരിച്ചുവരവിന് കാരണമാകുന്ന തിരിച്ചറിവ്, ആ തിരിച്ചറിവിലേക്കു

ഇന്റര്‍നാഷണല്‍ വോളന്റീയേഴ്‌സ് ഡെ അനുസ്മരണം നടത്തി

കൊല്ലം: ക്യു. എസ്. എസ്.എസിന്റെയും, കേരളാ സോഷ്യല്‍ സര്‍വ്വീസ് ഫോറത്തിന്റെയും, കാരിത്താസ് ഇന്ത്യയുടെയും സംയുക്ത ആഭിമുഖ്യത്തില്‍ ഇന്റര്‍നാഷണല്‍ വോളന്റീയേഴ്‌സ് ഡെ അനുസ്മരണത്തിന്റെ ഭാഗമായി കോവിഡ് -19 വാരിയേഴ്‌സിന്

ഫാത്തിമാവിശുദ്ധരുടെ തിരുശേഷിപ്പ് മോഷ്ടിച്ചു

വെറോണ: ഫാത്തിമായില്‍ പരിശുദ്ധ കന്യകമാതാവിന്റെ ദര്‍ശനം സിദ്ധിച്ച വിശുദ്ധരായ ഫ്രാന്‍സിസ്‌കോ, ജസീന്ത മാര്‍ത്തോ എന്നിവരുടെ തിരുശേഷിപ്പ് ഇറ്റലിയിലെ വെറോണയിലെ ദേവാലയത്തില്‍ നിന്ന് മോഷ്ടിക്കപ്പെട്ടു. ഈ വിശുദ്ധരുടെ വസ്ത്രത്തിന്റെ

No comments

Write a comment
No Comments Yet! You can be first to comment this post!

Write a Comment

Your e-mail address will not be published.
Required fields are marked*