Breaking News

വിശുദ്ധ പാതയിൽ ജെറോം പിതാവ്: ബിഷപ്പ് പോൾ ആന്റണി മുല്ലശ്ശേരി

വിശുദ്ധ പാതയിൽ ജെറോം പിതാവ്: ബിഷപ്പ് പോൾ ആന്റണി  മുല്ലശ്ശേരി
നൂറ്റാണ്ടുകളുടെ പൈതൃകം തേടുന്ന ചിരപുരാതനമായ കൊല്ലം രൂപത-അറബിക്കടലും അഷ്ടമുടിക്കായലും തഴുകിയുണര്‍ത്തുന്ന ഭാരതസഭാചരിത്രത്തിന്റെ പിള്ളത്തൊട്ടില്‍.  ക്രിസ്തുവിന്റെ അപ്പസ്‌തോലനായ വിശുദ്ധ തോമാശ്ലീഹയാലും ഭാരതത്തിന്റെ ദ്വിതീയ അപ്പസ്‌തോലനായ വിശുദ്ധ ഫ്രാന്‍സിസ് സേവ്യറിനാലും പടുത്തുയര്‍ത്തപ്പെട്ട വിശ്വാസസമൂഹം. എണ്ണിയാല്‍ തീരാത്ത വിശേഷണങ്ങളുള്ള, വര്‍ത്തമാനത്തെയും ഭാവിയെയും പ്രകമ്പനം കൊള്ളിക്കുന്ന ചരിത്രത്തിന്റെ കാഹളധ്വനിയായി മുഴങ്ങിക്കേട്ടുകൊണ്ടിരിക്കുന്ന ദേശിംഗനാടിന്റെ – കൊല്ലം രൂപതയുടെ ചരിത്രത്തിലേക്ക് സ്വര്‍ഗത്തില്‍നിന്നും പെയ്തിറങ്ങുന്ന വിശുദ്ധിയുടെ പൊന്‍തൂവലായി മാറുന്നു പുണ്യശ്ലോകനായ ജറോം പിതാവിന്റെ ദൈവദാസ പദവി.  
40 വര്‍ഷക്കാലം കര്‍മ്മം കൊണ്ടും ഹൃദയവിശുദ്ധികൊണ്ടും കൊല്ലം രൂപതയുടെ ചരിത്രത്തെ മാറ്റിമറിച്ച് സമൃദ്ധമായ മേച്ചില്‍പ്പുറങ്ങളിലേക്ക് തന്റെ ആടുകളെ നയിച്ച നല്ല ഇടയനായിരുന്നു അദ്ദേഹം.  ഫ്രാന്‍സിസ് പാപ്പയുടെ ‘ആടുകളുടെ മണമുള്ള ഇടയന്‍’ എന്ന അജപാലനദര്‍ശനത്തോടു ചേര്‍ത്തു വയ്ക്കാവുന്ന ജീവിതമായിരുന്നു ബിഷപ്പ് ജറോമിന്റേത്.  ”എല്ലാ പ്രകാരത്തിലും കുറെപ്പേരെ നേടേണ്ടതിന് ഞാന്‍ എല്ലാവര്‍ക്കും എല്ലാമായി മാറി” എന്ന വിശുദ്ധ പൗലോസിന്റെ വാക്കുകള്‍ അന്വര്‍ത്ഥമാക്കുന്നതായിരുന്നു അദ്ദേഹത്തിന്റെ  ജീവിതം. സാമ്പത്തികവും സാമൂഹികവും രാഷ്ട്രീയവും വിദ്യാഭ്യാസപരവുമായി പിന്നാക്കാവസ്ഥയില്‍ കഴിഞ്ഞിരുന്ന ഒരു ജനവിഭാഗത്തിന്റെ ഉയര്‍ത്തെഴുന്നേല്പിനുവേണ്ടി തന്റെ ജീവിതം സമര്‍പ്പിച്ചുകൊണ്ട് ജറോം പിതാവ് എല്ലാവര്‍ക്കും എല്ലാമായി മാറി.  കൊല്ലം രൂപതയുടെ ചരിത്രത്തെതന്നെ ജറോം പിതാവിനു മുമ്പും ശേഷവുമെന്ന് നമുക്ക് വിശേഷിപ്പിക്കാം. എല്ലാ പ്രകാരത്തിലും ഒരുപാട് പിന്നോക്കാവസ്ഥയില്‍ നിന്ന ഒരു രൂപതയെയാണ് ഇടയശുശ്രൂഷ ഏറ്റെടുത്തപ്പോള്‍ ജറോം പിതാവിന് ലഭിച്ചത്.  ദൈവം അദ്ദേഹത്തെ ഭരമേല്പിച്ച കൊല്ലം രൂപതയെന്ന നാണയത്തുട്ടിനെ മണ്ണില്‍ കുഴിച്ചിടാതെ അതു വര്‍ധിപ്പിച്ച് ദൈവത്തിനു സമര്‍പ്പിക്കുന്ന വിശ്വസ്തനായ കാര്യസ്ഥന്റെ മുഖവുമായിട്ടാണ് പിതാവ് രൂപതാ ശുശ്രൂഷയുടെ പടിയിറങ്ങിയത്. ശൂന്യതയില്‍ നിന്ന് അത്ഭുതങ്ങള്‍ സൃഷ്ടിച്ചുകൊണ്ടാണ് അദ്ദേഹം കടന്നുപോയത്.  
തന്റെ കര്‍മ്മവീഥികളില്‍ പൊന്നുവിളയിച്ച പുണ്യവാന്‍.  അദ്ദേഹത്തിന്റെ ശ്രമഫലമായിട്ടാണ് നാമിന്നു കാണുന്ന വളര്‍ച്ചകളൊക്കെ രൂപത കൈവരിച്ചത്. ജറോം പിതാവിന്റെ ത്യാഗോജ്വലമായ ജീവിതംകൊണ്ടാണ് കൊല്ലം രൂപത പുരോഗതിയുടെ പടവുതാണ്ടിയതെന്ന് നമുക്കു നിസംശയം പറയുവാന്‍ കഴിയും. ദൈവത്തിലും പരിശുദ്ധ കന്യകാമറിയത്തിലും ആശ്രയിച്ചുകൊണ്ട് അദ്ദേഹമെടുത്ത തീരുമാനങ്ങളും ഉറച്ച നിലപാടുകളുമാണ് ദീര്‍ഘമായ അദ്ദേഹത്തിന്റെ ഇടയശുശ്രൂഷയെ ഫലപ്രാപ്തിയിലെത്തിക്കാന്‍ സഹായിച്ചത്.  നിലപാടുകളില്‍ വെള്ളം ചേര്‍ക്കാതെ കലര്‍പ്പില്ലാത്ത തീരുമാനങ്ങളുടെ ഉടമയായിരുന്നു വന്ദ്യപിതാവ്.  സത്യത്തിലും ധര്‍മത്തിലും ഊന്നിയ പോരാട്ടമായിരുന്നു ആ ജീവിതം.  ഇടയവഴികളില്‍ കടന്നുവന്ന എല്ലാ പ്രതിസന്ധികളെയും വെല്ലുവിളികളെയും തന്റെ ആദര്‍ശശുദ്ധിയുള്ള ജീവിതംകൊണ്ട് പരാജയപ്പെടുത്തുവാന്‍ അദ്ദേഹത്തിനായി.  
സമാനതകളില്ലാത്ത വ്യക്തിവൈഭവങ്ങള്‍കൊണ്ട് സമ്പന്നമായിരുന്നു ആ ജീവിതം.  ഒരു കറകളഞ്ഞ ക്രൈസ്തവ താപസനും പൗരബോധമുള്ള ഉത്തമനായ ദേശസ്‌നേഹിയുമായിരുന്നു അദ്ദേഹം. വിദ്യാഭ്യാസ പ്രക്രിയയിലൂടെ സമൂഹത്തിലെ സകല അന്ധകാരവും മാറ്റുവാന്‍ കഴിയുമെന്ന് അദ്ദേഹം ഉറച്ചുവിശ്വസിച്ചു.  അതുകൊണ്ടുതന്നെ വിദ്യാഭ്യാസത്തിലൂന്നിയ അജപാലന പ്രവര്‍ത്തനമായിരുന്നു അദ്ദേഹത്തിന്റേത്.  വിദ്യാഭ്യാസം വിശുദ്ധനായ വിശ്വാസിയെയും പരിണിതപ്രജ്ഞരായ പൗരന്മാരെയും വാര്‍ത്തെടുക്കുമെന്ന് വിശ്വസിച്ചിരുന്ന വന്ദ്യപിതാവ് സഭയുടെയും സമൂഹത്തിന്റെയും വിദ്യാഭ്യാസ വികസനത്തിനുവേണ്ടി നിരവധി സ്ഥാപനങ്ങള്‍ക്ക് തുടക്കം കുറിച്ചു.  
ശബ്ദമില്ലാത്തവന്റെ ശബ്ദമായിരുന്നു ജറോം പിതാവ്. അധകൃതരായ ന്യൂനപക്ഷങ്ങളുടെ ശബ്ദവും അവരുടെ അവകാശങ്ങള്‍ക്കുവേണ്ടിയുള്ള പോരാട്ടങ്ങളുടെ മുന്നണി പോരാളിയുമായിരുന്നു അദ്ദേഹം.  ഋഷിതുല്യമായ ആ ജീവിതം അന്ധകാരത്തില്‍ കഴിഞ്ഞിരുന്ന ഒരു ജനസമൂഹത്തിന്റെ മധ്യത്തില്‍ സര്‍വ്വേശ്വരന്‍ തെളിച്ച കുഞ്ഞു മണ്‍ചിരാതായിരുന്നു. ഒമ്പതു പതിറ്റാണ്ടുകാലത്തെ മണ്ണിലെ ആ ജീവിതം തന്റെ ജനത്തിനുവേണ്ടി കത്തിജ്വലിക്കുന്നതായിരുന്നു. ആഴമായ ദൈവവിശ്വാസവും മാതൃഭക്തിയും തുളുമ്പിനിന്ന അദ്ദേഹത്തിന്റെ ഹൃദയത്തിന്റെ നന്മ ആപ്രകാശത്തെ അണയാതെ കാത്തുസൂക്ഷിച്ചു. 
മണ്ണില്‍ ദൈവം തെളിയിച്ച ആ മണ്‍ചിരാത് ഇന്ന് വിണ്ണിലെ വിശുദ്ധിയുടെ പൊന്‍താരകമായി മാറാന്‍ സര്‍വ്വശക്തന്റെ കൃപയുണ്ടാകണമെന്ന് നമുക്ക് പ്രാര്‍ത്ഥിക്കാം.  

Related Articles

അതിരുകടക്കുന്ന അപ്പോളജറ്റിക്‌സുകള്‍

വാളെടുക്കുന്നവര്‍ എല്ലാവരും വെളിച്ചപ്പാടുകളാകുന്നതു പോലെയാണ് സമൂഹമാധ്യമങ്ങളില്‍ ഇപ്പോള്‍ അപ്പോളജറ്റിക്സുകള്‍. തങ്ങളുടെ മതങ്ങളുടെ സംരക്ഷണം സ്വയം ഏറ്റെടുത്തുകൊണ്ട് അവര്‍ അപ്പോളജറ്റിക്സ് അഥവാവിശ്വാസ സമര്‍ത്ഥനം എന്ന പേരില്‍ സഹജ വിദ്വേഷവും

കൊച്ചിയിലെ വെള്ളക്കെട്ട്: ഒന്നാംഘട്ടം മേയ് മധ്യത്തിനുമുമ്പ് തീര്‍ക്കണമെന്ന് കോടതി

കൊച്ചി: കൊച്ചി നഗരത്തിലെ വെള്ളക്കെട്ട് ഒഴിവാക്കാനുള്ള പദ്ധതിയുടെ ഒന്നാം ഘട്ടം മേയ് മധ്യത്തിനുമുമ്പ് പൂര്‍ത്തിയാക്കണമെന്ന് ഹൈക്കോടതി നിര്‍ദ്ദേശം നല്‍കി. കൊച്ചി നഗരത്തിലെ വെള്ളക്കെട്ട് ഒഴിവാക്കാന്‍ പേരണ്ടൂര്‍ കനാല്‍

ഹൃദയത്തില്‍ ജീവിക്കുന്ന ജോണ്‍സണ്‍ മുത്തപ്പനച്ചന്‍

  സ്‌നേഹം നിറഞ്ഞ ജോണ്‍സണ്‍ മുത്തപ്പനച്ചന്‍ യാത്രയായി. തികച്ചും അപ്രതീക്ഷിതമായിട്ടാണ് ഈ വിടവാങ്ങല്‍. മരിക്കുന്നതിന് തലേദിവസവും അദ്ദേഹം അര്‍പ്പിച്ച ദിവ്യബലിയില്‍ ഞാന്‍ പങ്കെടുക്കുകയുണ്ടായി. അതിനുശേഷം അദ്ദേഹത്തോട് സംസാരിച്ചു.

No comments

Write a comment
No Comments Yet! You can be first to comment this post!

Write a Comment

Your e-mail address will not be published.
Required fields are marked*