വെള്ളാപ്പള്ളി നടേശന് നടത്തിയ പ്രസ്താവന തരംതാണതും അനുചിതവുമാണെന്ന് കെസിവൈഎം സംസ്ഥാന സമിതി
കൊച്ചി: കേരള നവോത്ഥാനത്തില്‍ ക്രിസ്ത്യന്‍-മുസ്ലിം വിഭാഗങ്ങള്‍ ഉള്‍പ്പെടുന്ന ന്യൂനപക്ഷങ്ങള്‍ക്ക് പങ്കില്ലെന്ന തരത്തില്‍ എസ്എന്‍ഡിപി യോഗം ജനറല്‍ സെക്രട്ടറി വെള്ളാപ്പള്ളി നടേശന് നടത്തിയ പ്രസ്താവന തരംതാണതും അനുചിതവുമാണെന്ന് കെസിവൈഎം സംസ്ഥാന സമിതി കുറ്റപ്പെടുത്തി. ചരിത്രം വളച്ചൊടിച്ച് നടത്തുന്ന ഇത്തരം പ്രസ്താവനകള്‍ സമൂഹത്തെ വലിയ വിഭാഗീതയിലേക്കും സംഘര്‍ഷത്തിലേക്കും കൊണ്ടെത്തിക്കുവാന്‍ സാഹചര്യമൊരുക്കുന്നുവെന്ന് കെസിവൈഎം സംസ്ഥാന സമിതി നിരീക്ഷിച്ചു. കേരളത്തില്‍ എല്ലാ സമൂഹങ്ങളില്‍ നിന്നും നവോത്ഥാന നായകര്‍ ഉണ്ടായിട്ടുണ്ട്. കേരള സമൂഹത്തിന് വിദ്യാഭ്യാസം പകര്‍ന്നുനല്‍കുന്നതിന് വിശുദ്ധ ചാവറ കുര്യാക്കോസ് അച്ചനെ പോലുള്ളവരും ക്രിസ്ത്യന്‍ മിഷണറിമാരും നടത്തിയ സേവനങ്ങള്‍ നിസ്വാര്‍ത്ഥമാണ്. കേരളത്തിലെ എല്ലാ വിഭാഗങ്ങളിലുമുള്ള ജനങ്ങളെ ഒരു പോലെ ഉള്‍ക്കൊള്ളുവാനും അവര്‍ക്ക് വിദ്യാഭ്യാസവും മറ്റു അടിസ്ഥാന സൗകര്യങ്ങളും നല്‍കുന്നതിനും ഏറ്റവുമധികം മുന്‍കയ്യെടുത്തത് കേരളത്തിലെ കത്തോലിക്കാസഭയാണ്. കേരളത്തില്‍ അതിരൂക്ഷമായ ജാതിവിവേചനങ്ങള്‍ നിലനിന്നിരുന്ന കാലത്തുപോലും ജാതീയ വിവേചനങ്ങളില്ലാതെ എല്ലാ മനുഷ്യരെയും ഒരുപോലെ കാണുകയും സ്‌നേഹിക്കുകയും ചെയ്ത ചരിത്രമാണ് കേരളത്തിലെ ക്രൈസ്തവ സഭകള്‍ക്കുള്ളത്. ഹിന്ദു, മുസ്ലിം, ക്രിസ്ത്യന്‍ വിഭാഗങ്ങളില്‍ നിന്ന് നിരവധി നവോത്ഥാന നേതാക്കന്മാര്‍ ഉണ്ടായിട്ടുള്ളതാണ്. ഇത്തരം കാര്യങ്ങളെല്ലാം മനപൂര്‍വം വിസ്മരിച്ച് തങ്ങള്‍ മാത്രമാണ് കേരള നവോത്ഥാനത്തില്‍ പങ്കാളികളായത് എന്ന് വരുത്തിതീര്‍ക്കാനുള്ള ശ്രമം കേരളസമൂഹത്തെ അപമാനിക്കുന്നതിനു തുല്യമാണ്. വെള്ളാപ്പള്ളി നടേശനെ പോലുള്ളവരുടെ വിദ്വേഷജനകമായ പ്രസ്താവനകള്‍ തള്ളിക്കളയുവാന്‍ കേരളത്തിലെ ചരിത്രം അറിയുന്ന പ്രബുദ്ധരായ ജനങ്ങള്‍ മുന്നോട്ടു വരണമെന്ന് കെസിവൈഎം ആഹ്വാനം ചെയ്തു. ഇത്തരം പ്രചരണങ്ങള്‍ നടത്തുന്നത് തുടര്‍ന്നാല്‍ വെള്ളാപ്പള്ളി നടേശന് സമൂഹം നല്‍കുന്നത് വര്‍ഗീയവാദിയുടെ പരിവേഷമായിരിക്കുമെന്ന് കെസിവൈഎം ഓര്‍മിപ്പിച്ചു. പ്രസിഡന്റ് ഇമ്മാനുവല്‍ മൈക്കിള്‍, ജനറല്‍ സെക്രട്ടറി എബിന്‍ കണിവയലില്‍, ഡയറക്ടര്‍ റവ. മാത്യു ജേക്കബ് തിരുവാലില്‍, ഭാരവാഹികളായ ജോബി ജോണ്‍, ആരതി റോബര്‍ട്ട്, ജോമോള്‍ ജോസഫ്, സ്റ്റെഫി സ്റ്റാന്‍ലി, ലിജിന്‍ സ്രാമ്പിക്കല്‍, കിഷോര്‍ പി, ടോം ചക്കാലക്കുന്നേല്‍ എന്നിവര്‍ സംസാരിച്ചു.
Related Articles
ആണ്ടുവട്ടം നാലാം ഞായര്‍: 31 January 2021
First Reading: Dt 18:15-20 Responsorial Psalm: Ps 95:1-2, 6-7, 7-9 Second Reading: 1 Cor 7:32-35 Gospel Reading: Mark 1:21-28 ആണ്ടുവട്ടം നാലാം ഞായര്‍ ആണ്ടുവട്ടത്തിലെ
കുമ്പസാരത്തെ അവഹേളിച്ച മഴവില്‍ മനോരമയ്‌ക്കെതിരെ സാമൂഹ്യമാധ്യമങ്ങളില്‍ കടുത്ത പ്രതിഷേധം
കത്തോലിക്കാ സഭയുടെ വിശുദ്ധ കൂദാശയായ കുമ്പസാരത്തെ അവഹേളിക്കുന്ന രീതിയിൽ മഴവിൽ മനോരമയിൽ കോമഡി പരിപാടി സംപ്രേക്ഷണം ചെയ്തിരുന്നു. “തകർപ്പൻ കോമഡി” എന്ന പരിപാടിയിലൂടെയാണ് കുമ്പസാരത്തെയും വൈദികനെയും വികലമായി
പ്രളയബാധിതര്‍ക്ക് കണ്ണൂര്‍ രൂപതാ വൈദികരുടെ ഒരു മാസത്തെ അലവന്‍സ്
കണ്ണൂര്‍: പ്രളയബാധിതര്‍ക്കുവേണ്ടിയുള്ള മുഖ്യമന്ത്രിയുടെ ദുരിതാശ്വാസ നിധിയിലേക്ക് കണ്ണൂര്‍ രൂപത വൈദികര്‍ ഒരു മാസത്തെ അലവന്‍സ് നല്‍കി. വൈദികരുടെ വാര്‍ഷിക ധ്യാനത്തിന്റെ സമാപന ചടങ്ങില്‍ സംഭാവന തുക ബിഷപ്
