ഹാര്‍ട്ടറ്റാക്കിനുശേഷം സ്‌ട്രെസ് മാനേജ്‌മെന്റ് തെറാപ്പി
1984ല്‍ ബൊഹാച്ചിക് ഹാര്‍ട്ടറ്റാക്കുണ്ടായ നിരവധി രോഗികളെ നിരീക്ഷിച്ചുകൊണ്ട് നടത്തിയ പഠനം ശ്രദ്ധയാകര്‍ഷിക്കുന്നു. അറ്റാക്കിനു ശേഷം വ്യായാമ പദ്ധതികള്‍ സംവിധാനം ചെയ്ത് രോഗികളെ രണ്ട് വിഭാഗങ്ങളായി തിരിച്ചു. ഒരുകൂട്ടരില്‍ വ്യായാമമുറകളോടൊപ്പം ഉല്ലാസവും സംതൃപ്തിയും പ്രദാനം ചെയ്യുന്ന തെറാപ്പിയും (Relaxation Therapy) മറ്റു വിഭാഗത്തില്‍ വ്യായാമപദ്ധതിമാത്രവും. മൂന്നാഴ്ചക്കാലത്തോളം പരീക്ഷിച്ചപ്പോള്‍ ആദ്യവിഭാഗത്തില്‍പ്പെട്ടവരില്‍ ഹൃദ്രോഗതീവ്രത കുറയ്ക്കുന്നതിനുതകുന്ന അത്ഭുതകരമായ പ്രവര്‍ത്തനങ്ങള്‍ കാണപ്പെട്ടു. ഇക്കൂട്ടരില്‍ വിഷാദം, ഉത്കണ്ഠ, ഭയം, നിരാശ എന്നീ വികാരങ്ങള്‍ക്ക് വേലിയേറ്റമുണ്ടായതായി കണ്ടില്ല. ഈ അവസ്ഥാവിശേഷം തുടര്‍ന്നുള്ള ഹൃദ്രോഗ ചികിത്സയ്ക്ക് അനുകൂലമായി ഭവിച്ചു. ഇക്കൂട്ടരില്‍ നെഞ്ചുവേദന പിന്നീടുണ്ടായിട്ടില്ല. ഹൃദയപ്രവര്‍ത്തനം സന്തുലിതമായി. മനോവ്യഥകള്‍ അതിരുകടക്കുമ്പോള്‍ ഉണ്ടാകുന്ന ജൈവ-രാസ പരിവര്‍ത്തനങ്ങള്‍ ഹൃദയപേശികളില്‍ പ്രാണവായുവിന്റെ അനിവാര്യത അനിയന്ത്രിതമായി വര്‍ധിപ്പിക്കുമ്പോഴാണ് അറ്റാക്കുണ്ടായി തളര്‍ന്നു കിടക്കുന്ന ഹൃദയഭിത്തികള്‍ക്ക് കൂടുതല്‍ പരിക്കുകള്‍ സംഭവിക്കുന്നത്. എത്രയെത്ര മേന്മയേറിയ ചികിത്സ നടത്തി തുടര്‍ഔഷധങ്ങള്‍ നല്‍കിയാലും മനസിന്റെ സന്തുലിതാവസ്ഥയെ തകിടം മറിയ്ക്കുന്ന ഉദ്ദീപനഘടകങ്ങളെ കടിഞ്ഞാണിടാത്തിടത്തോളം ഹൃദ്രോഗ കാഠിന്യം സമുചിതമായി നിയന്ത്രിക്കപ്പെട്ടെന്നുവരില്ല. ഇക്കാരണത്താല്‍ തന്നെ അറ്റാക്ക് സംഭവിച്ച രോഗിയുടെ പരിചരണത്തില്‍ മാനസിക പരിണാമങ്ങളെ ക്രിയാത്മകമാക്കുന്നതിന് ഉതകുന്ന കൗണ്‍സിലിങ്ങും ‘ബിഹേവിയറല്‍ തെറാപ്പി’യും ഭിഷഗ്വരന്‍ ശ്രദ്ധാപൂര്‍വം സംവിധാനം ചെയ്യേണ്ടതാണ്. രോഗിക്ക് മാനസിക പ്രചോദനങ്ങളേയും ചേഷ്ടകളെയും അപഗ്രഥനം ചെയ്ത് ഓരോരുത്തര്‍ക്കും ഉചിതമായ നിര്‍ദേശങ്ങള്‍ നല്‍കുവാന്‍ ഭിഷഗ്വരന്‍ മുന്‍കൈയെടുക്കണം. ഇത് രോഗിയുടെ ശിഷ്ട ജീവിതത്തെ പ്രോജ്വലമാക്കുക തന്നെ ചെയ്യും. ഇങ്ങനെയാണ് ‘സ്വഭാവ സ്വാധീന ഹൃദ്രോഗ ശാസ്ത്രം’ (Behavioral Cardiology) എന്ന ചികിത്സാശാഖ തന്നെ ജന്മമെടുത്തത്. രോഗശാന്തിക്കായി നടത്തപ്പെടുന്ന മധ്യസ്ഥപ്രാര്‍ഥനയുടെ പ്രസക്തിയും നൂറ്റാണ്ടുകളായി സ്ഥിരീകരിക്കപ്പെട്ടിട്ടുള്ള വസ്തുതയാണ്. രോഗശയ്യയില്‍ നിരാലംബനായി കിടക്കുന്ന രോഗിക്ക് ആശ്വാസം ലഭിക്കുവാനായി രോഗിയും മറ്റുള്ളവരും കൂട്ടായി നടത്തുന്ന പ്രാര്‍ഥന രോഗിയെ അനുകൂലമായി ബാധിക്കുമെന്നതിന് സംശയമില്ല. ഇതിനെ ശാസ്ത്രീയമായി വിലയിരുത്തുന്ന പഠനങ്ങളും നടന്നിട്ടുണ്ട്.
Related Articles
അത്യപൂര്‍വമായ ഒരു പുന:സമാഗമം
മനുഷ്യന്‍ എന്ന സൃഷ്ടി ഒരു ആധ്യാത്മിക ജീവിയെന്ന നിലയില്‍ വ്യക്തിബന്ധങ്ങളുടെ അഗാധമായ ഊഷ്മളതയിലൂടെയാണ് നിര്‍വഹിക്കപ്പെടുന്നത്. ഒരു വ്യക്തി എത്ര തന്മയത്വമായി ഈ ബന്ധങ്ങളില്‍ പരിലസിക്കുന്നുവോ അത്ര
സ്ത്രീകളില്‍ ഹൃദ്രോഗം തടയാന്‍ പത്തു വഴികള്‍
ഡോ. ജോര്‍ജ് തയ്യില്‍ സ്ത്രീകളില്‍ ഹൃദയധമനീ രോഗങ്ങള്‍ തടയാന്‍ അമേരിക്കന്‍ ഹാര്‍ട്ട് അസോസിയേഷന്‍ പ്രസിദ്ധീകരിച്ച പുതിയ മാര്‍ഗരേഖകള്‍: 1. ദിവസവും 30 മിനിറ്റെങ്കിലും ഊര്‍ജസ്വലമായി നടക്കുക. ഭാരം
കൊളസ്‌ട്രോളും പാവം മുട്ടയും പിന്നെ തീരാത്ത സംശയങ്ങളും
ഒരിക്കലും ഒടുങ്ങാത്ത ദുരൂഹതകളും സംശയങ്ങളും ആളുകള്‍ക്കിടയിലുണ്ട്. എന്തൊക്കെ വിശദീകരണങ്ങള്‍ കൊടുക്കുവാന്‍ ശ്രമിച്ചാലും അവ അപരിഹാര്യമായ നിഗൂഢതയായി അവശേഷിക്കുന്നു. മരണത്തെ മറികടക്കാന്‍ തത്രപ്പെടുന്ന മനുഷ്യന്റെ മാറാസ്വപ്‌നങ്ങള്‍ക്ക് നിത്യഭീഷണിയാകുകയാണ്
